གཏམ་དཔེ།

བཟོ་ མཁས་པས་ རྐྱབས། སྐྱོན་ ལྐུག་ཀས་ བཏོན།

བུ་ ཞེ་ལོག་ ཏོག་ཡུ་ ལུག་ལུག་ཀར། བུམ་ ཞེ་ལོག་མོ་ ཨོ་ཉེ་ ཨོམ་ བྱི༹ན་བྱི༹ན་བར།

ལམ་ འཛོལ་ན་ ལོག་ས་ ཡོད། ཁ་ འཛོལ་ན་ ལོག་ས་ མེད།

ལབ་ ཤེས་ན་ ཁའི་ ཟོན། འགྱུ་ ཤེས་ན་ རྐང་པོའི་ ཟོན།

སྔ་རུ་ ལྷ་སྒོ་ ཕྱི༹། ཕྱི༹་རུ་ འདྲེ་སྒོ་ བཅད།

ཕམ་ ཞན་བོའི་ བོ་ཙོ། ཞིང་ ཞན་བོའི་ ལོ་ཐོག།

བསམ་བློ་ སྔོནལོ། འགྱོད་བོ་ བཤུལ་ལོ།

ཁྱི་ སྤྱོད་ངན་ མནོ་བསམ་ བཏང་ བཞིན་ངུ་། མི་ སྤྱོད་ངན་ རང་སྐྱོན་ སྦས་བཞིན་ ངུ་།

མེས་ ལྗེན་པོ་ མི་ལབ། རྒྱལ་པོས་ སྤྱ༹ང་ཀ་ མི་ལབ།

ཟ་ཁར་མ་ བཙོག་ཀོ་ མ་བསམ། ཉལ་བའི་ སྒང་ བུ་ལེན་ མ་བསམ།

ཟམ་ ཉུང་ཉུང་ བཅུད། ཟམ་ མང་དྲགས་ ལུད།

ཨ་ལུས་ མེད་པའི་ རྒྱལ་ལོ། བི་རྩི་ཀི་ གཞས།

ཆང་ སྐྱུར་མའི་ ཁག་མང་། མི་ ངན་པའི་ གྱོས་ མང་།

ཞེ་ལོག་ ཞིམ་དད་ ཆེ། མེད་པོ་ཅན་ ཛ་ དད་ ཆེ།

ལེམ་ ལབ་ན་ མི་ མི་དགའ། འབྱི༹ག་ཀོ་ དབྱུག་ན་ ཁྱི་ མི་དགའ།

ཟ་མྱོང་ མེད་པའི་ མི་ལོ་ སྣེའོ་ཚིག་ བྱོ༹ག་ཀོ་ ཚོར།

འགྱུ་མྱོང་ མེད་པའི་ མི་ལོ་ ཐེམ་པང་ ལ་ ཚོར།

ཟུག་ མགོའི་ སྟེང་། སྨན་ ལྟི་སྟི་ སྟེང་།

ཐུབ་བསྟན་དཔལ་བཟང་།

  ༈ འབྲས་ལྗོངས་ལོ་ སངས་རྒྱས་ གཙོ་འཁོར་ གསུམ་གྱི་ རིང་བསྲེལ་ མཇལ་ཁ།

སྦས་ཡུལ་ འབྲས་མོ་ གཤོངས་ཀྱི་ གནས་ཆེན་ བྲག་དཀར་ བཀྲ་ཤིས་ སྡིངས་ལོ་ ཕྱི་ལོ་༢༠༡༣་ ཟླ་༠༢་ཚེས་༢༤་ལས་༢༦་ ཟངས་ཏེ་ ཉིན་གསུམ་རིང་ སྟོན་པ་ རྫོགས་པའི་ སངས་རྒྱས་ཀྱི་ རིང་བསྲེལ་ མཇལ་ཁ་ འབྲས་ལྗོངས་ཀྱི་ དགོན་པ་ གསུམ་ན་ལོ་ མཇལ་ཁ་ གནང་བོ་ ཨིན། དང་པོ་ དབེན་ཅེ་ དགོན་པ་ རྣམ་རྩེ་ གསེར་གྲུབ་ ཆོས་གླིང་ དགོན་པ་ དང་ གནས་ཆེན་ བྲག་དཀར་ བཀྲ་ཤིས་ སྡིངས་ལོ་ བུམ་ཆུ་ རིན་པོ་ཆེ་ དང་ སྟོན་པ་ གཙོ་འཁོར་གསུམ་གྱི་ རིང་བསྲེལ་ དད་ལྡན་ མི་མང་ ཐམས་ཅད་ལོ་ གནས་ཆེན་ བྲག་དཀར་ བཀྲ་ཤིས་སྡིངས་ལོ་ མཇལ་ཁ་ གནང་བོ་ ཨིན། འདི་ སྐབས་ལོ་ བུམ་ཆུ་ རིན་པོ་ཆེ་ཡང་ ཆད་ལྷག་ གན་ཡང་ མེད་པོ་ བྱ༹ས་ རྟག་མཚན་ཙུ་ བཟང་པོ་ཡང་ ཐོན་འདུག གངས་རི་ སྤངས་ལྗོངས་ ཐམས་ཅད་ སྨྱུ་གུའི་ སྦུབས་སུ་ ཤར་བོ་ དང་ གངས་རི་ ཐམས་ཅད་དཀར་པོ་ ཁ་བ་བབས་པོ་ དང་ ཆར་ཆུ་ དུས་ལོ་ འབབ་པོ་ དང་ ལོ་ ཆུ་ རྟག་ལོ་ ལེགས་པའི་ དུས་ཚོད་ བཟང་པོ་ ཉིན་མོ་ དང་ མཚན་མོ་ ཐམས་ཅད་ ཉི་ཟླ་ ཤར་བོ་ དང་ དུས་ཚོད་ ཕུན་སུན་ ཚོགས་པོ་བཟང་པོ་ཤར་བོ་ ཨིན་བོ་ མི་ཚད་ འབྲས་ལྗོངས་གནས་ཆེན་ བྱ༹ག་དཀར་ བཀྲ་སྡིངས་ཀྱི་ མི་ཙུ་ བསོད་ནམས་ བཟང་པོ་ ཨིན་བོ་ ང་གིས་ བསམ་བོ་ ཨིན། འབྲས་ལྗོངས་ ནང་ལོ་ སྔོན་མ་ལས་ མ་ཐོན་བའི་ དུས་ཚོད་ བཟང་པོ་ འདི་ འབྲས་ལྗོངས་ མི་མང་ ཡོངས་ཀྱི་ བསྐལ་བ་ བཟང་པོ་ ཚོགས་བསགས་ དགེ་སྦྱོང་གི་ འབྲས་བུ་ ཨིན་བོ་ མི་མང་ ཐམས་ཅད་ཀྱི་ དགའ་སྐྱིད་ ལྡན་པའི་ ཉིན་མོ་ དུས་རྟག་པར་ བཟང་པོ་ ཤར་བཅུག་ སེ་ཞུ། གན་ལྟར་ཡང་ གནས་ཆེན་ འདི་ནང་ བཞུགས་ཡོད་པའི་ དད་ལྡན་ཙུ་ ཐམས་ཅད་རང་གི་ དད་སྨོད་ བཞིན་བྱ༹ས་ ཡོད་པོ་ ཡ་ཏེ་ མེད་པོ་ རང་གི་ བསམ་ཚུལ་ བཞིན་ ཕྱག་ དང་ མཆོད་པོ་ མཎྡལ་རྒྱ་ ཆེན་པོ་ འབུལ་བོ་ སྦད། འདི་ འདྲ་བོ་ བྱ༹ས་ འབྲས་ལྗོངས་ གནས་ཁྱད་པར་ཅན་ དང་ སྟོན་པ་ གཙོ་འཁོར་ གསུམ་གྱི་ རིང་བསྲེལ་ འདི་ གནས་ཆེན་ལོ་ མི་མང་ ཐམས་ཅད་ཀྱི་ མཇལ་ཁ་ ཐོབ་པོ་ འདི་ བསྐལ་པ་ བཟང་པོ་ སྦད་སེ་ མཁན་ཆེན་ ལྷ་ཚེ་རིང་ གསུངས་བོ་ ཨིན། འདི་འདེམ་ དུས་ཚོད་པོ་ བཟང་པོ་ ཤར་བོ་ འདི་ འབྲས་ལྗོངས་ཀྱི་ དུས་ཆེན་ ཚོགས་པོ་ གཙོ་འཛིན་ཙུ་ཀིས་ ཐུགས་རྗེ་ བཀའ་དྲིན་ སྦད། ང་ཅག་ ཐམས་ཅད་ཀྱི་ དུས་ཆེན་ ཚོགས་པོའི་ ལྷན་རྒྱས་ ཐམས་ཅད་ དང་ དགོན་པོ་ རང་རང་སོ་སོའི་ བླ་གྲྭ་ ཐམས་ཅད་ལོ་ སྙིང་ལས་རང་ ཐུགས་རྗེ་ ཆེ་ཆེ་ ཞུ་དོ་ ཨིན།།

འབྲས་ལྗོངས་ མི་ཙུ་ བསྐལ་པ་བཟང་། །སྟོན་པ་ གཙོ་འཁོར་ གསུམ་གྱི་བསྲེལ།

།མཇལ་བའི་ བསོད་ནམས་ བཟང་པོ་ཨིན། །ཡང་ཡང་ མཇལ་བའི་ སྨོན་ལམ་འདེབས༎ ༎

                                                              ཐུབ་བསྟན་དཔལ་བཟང་།