Denjongke lho kay blog.
Thursday, 19 March 2015
Friday, 13 March 2015
མྱོལ་གྲོལ་ བུམ་ཆུ་ རིན་པོ་ཆེ་༏ ༢༠༡༥
༈ ཕྱི་ལོ་ ༢༠༡༥ ཟླ་བ༷་༣ ཚེས་༤ དང་ ༥
གནས་ཆེན་ བྲག་དཀར་ བཀྲ་ཤིས་ སྡིངས་ལོ་ མྱོང་གྲོལ་ བུམ་ཆུ་ རིན་པོ་ཆེའི་ མཇལ་ཁ་ གནང་བའི་ མཛད་རིམ་ མདོར་བསྡུས་ ནེ། བྲག་དཀར་ བཀྲ་ཤིས་ སྡིངས་སུ་ ལོ་ལྟར་ བུམ་ཆུའི་ དུས་སྟོན་ བཟང་པོ་ ཉིན་ལོ་ བྱོན་མཁན་ དད་ལྡན་ མི་མང་ སྐྱ་སེར་ ཕོ་མོ་ཙུ་ལོ་ བྱིན་ཆེན་ བུམ་པའི་དབང་ དང་ མཇལ་ཁ། འདི་ལས་ མྱོང་གྲོལ་ བུམ་ཆུའི་ འགོ་འགྲེམ་ གནང་བའི་ སྐབས་ལོ་ བཞུགས་ཡོད་པའི་ གཙོ་འཛིན་ འབྲས་ལྗོངས་ཀྱི་
སྐྱབས་རྗེ་ མཁན་ཆེན་ རིན་པོ་ཆེ་
མཆོག་ དང་ བཀྲ་སྡིངས་ དགོནགྱི་ བླ་གྲྭ་
འདུས་ཚོགས་ ། འབྲས་གཞུང་ དགོན་ནས་ སྐུ་ཚབ། ཡུག་སམ་ བཀྲ་སྡིངས་ཀྱི་ འོས་ལོང་ཐུན་མི་ སྐུ་ཞབས་ བསོད་ནམས་ དགྲ་འདུལ་ མཆོག་དང་། ཁོང་ལྷན་རྒྱས་ ཡོངས་ཀྱི་ སྐུ་འདུན་ལོ་ བུམ་ཆུའི་ ཞལ་ཕྱི༹་ དང་
རྟགས་མཚན་ཙུ་ གཟིགས་ཞིབ་ གནང་བའི་ སྐབས་ལོ་ ལོ་ དུས་ཅིག་ བུམ་ཆུ་ རིན་པོ་ཆེ་ ངོ་མཚར་བའི་ རྟགས་མཚན་ ཁྱད་པར་ཅན་ གན་ཐོན་འབོ་ སེ་ཞུ་ན། བུམ་པའི་ ནང་ལོ་ ཁྲུས་ཆུ་སྟིང་ ཉི་ཤུ་ ཙ་གཅིག་ ཡོད་པའི་ ནང་ལས་ ད་ལོ་ སྟིང་ཕྱེ༹ད་ ལྷག་ཀོ་ ཐོན་བའི་ རྟགས་མཚན་ བཟང་པོ་ བྱུང་འདུག རྟགས་མཚན་ བཟང་པོ་ བྱུང་བའི་ ཕན་ཡོན་ ནེ། བུམ་ཁྲུས་ འདི་ ལྷག་ཆད་ དང་ ལེགས་ཉེས་ཀྱི་
ལུང་བསྟན་ ཡང་ གསས་དྲགས་ ཧ་གོ་ཚུགས། དང་པོ་ ཁྲུས་རྙོག་ཀ་ ཟིང་ཟིང་ཡོད་ན་ སྐྱིད་པོ་
མི་ཐོན། གཉིས་པོ་ ཁྲུས་ཆད་ན་ མུ་གུ་ ཐོན་ཤད་ཨིན་། གསུམ་པོ་ བུམ་ཁྲུས་ ལྷག་ན་ ཕུན་སུམ་
ཚོགས་དྲགས་ ཐོན་ཤད་པའི་ རྟགས་ ཨིན། འདི་ འདེམ་ རྟགས་མཚན་ བཟང་པོ་ ངོ་མཚར་ཆེན་པོ་ ལོ་དུ་ཅིག་
ཐོན་བོ་འདི་ནེ་ སྤྱིར་ འཛམ་བུ་གླིང་ དང་ བྱེ་བྲག་ སྦས་ཡུལ་ འབྲས་མོ་ལྗོངས་ལོ་ བཀྲ་ཤིས་པོ་
ཁ་བྲོ་དྲགས་ ནད་དང་ མུ་གེ་ འཁྲུགས་རྩོད་ སོགས་ཐམས་ཅད་ རང་བཞིན་གྱི་ ཞི་ཤད་ཡོད་པོ་ མཐུན་རྐྱེན་
ལེགས་ཚོགས་ ཐམས་ཅད་ འཛོམ་ཤད་ ཡོད་པའི་ རྟགས་མཚན་ ཁྱད་པར་ཅན་ཅིག་ ཡིན་ནོ།
དུས་ཅིག་ བུམ་ཆུའི་ སྐབས་ལོ་ དམིགས་གསལ་གྱི་ དོན་ཚན་ གཙོ་བོ་ནེ་ སྤྱིར་ རྒྱ་གར་གྱི་ སྲིད་བློན་ མཆོག་གི་ དགོངས་པོ་ དོན་བཞིན་
རྒྱལ་ཁབ་ གཙང་དྲགས་ བཟོ་ཤད་ དང་ འབྲེལ་བའི་ ལས་རིམ། ལྷག་པར་གྱི་ གནས་ཆེན་ བྲག་དཀར་ བཀྲ་ཤིས་ སྡིངས་ལོ་ གཙང་དྲགས་ བཟོ་ཤད་ དང་། གྱིག་ཤོག་ ནང་གྱི་ ཚོགས་རྫས་ཙུ་ བེད་སྤྱོད་ ཉུང་ཉུང་ བྱ༹ས་ཤད་ དང་། རང་གྱི་ རིག་གཞུང་ དང་ མཐུན་བོ་ ཡང་ལས་ནེ་ རང་ཁྱིམ་
ནང་ལས་ བཟོ་བཟོ་བའི་ ཚོགས་རྫས་ཙུ་ བེད་སྤྱོད་ བྱ༹ས་ཤད་ སོགས་ཀྱི་དོན་ལོ།
འབྲས་ལྗོངས་ ཐམས་ཅད་ལོ་ ཁྱབ་འཕེལ་ བྱ༹ས་བའི་ དོན་ལས་ དམིགས་དོན་ གཙོ་བོ་ གནང་ འདུག འབྲས་གཞུང་གི་ ཁྱབ་བསྒྲགས་ ཨང་གི་ Memo no 544/GVK/CHO/RM&DD/15 DATE
26/2/2015 འདི་ནང་ལོ་ དོན་ཚན་ གཙོ་བོ་ བཀྲ་ཤིས་སྡིངས་ བུམ་ཆུ་ སྐབས་ལོ་ གཙང་དྲགས་ བཟོ་ཤད། གྱིག་ཤོག་གྱི་ བཟོ་ཡོད་པོའི་ ཆ་ཀ་ཙུ་ བེད་སྤྱོད་ མི་བྱ༹ས་ཤད། ཐ་མ་ཁ་ ཆང་ དང་ ཤ་སོགས་ བེད་སྤྱོད་ བྱ༹ས་མི་ཆོག་པོ་ དང་ ཚོང་པོ་ཙུ་ རང་གིས་ ཚོང་ཁང་ འདུན་གྱི་ ས་ཆ་ ཐམས་ཅད་ གཙང་དྲགས་ བཟོ་དགོས་པོ་སོགས་ ཁྱབ་སྒྲགས་ གནང་བོ་ སྦད། དོན་ཚན་ འདི་ལོ་ གཟིགས་སྟི་ དད་ལྡན་ མི་མང་ བརྒྱ་ཆ་ ༡༠༠% ནང་ལས་ དྲུག་ཅུ་༦༠% ཐམ་པ་ཀིས་ གོང་གི་ བཀའ་རྒྱ་འདི་ལོ་
གཟིགས་སྟི་ ལག་ལེན་ གནང་འདུག་ བརྒྱ་ཆ་ ༤༠% འདེ་ཚོད་ གཅིག་གིས་ ཁ་ཤས་ མ་གཟིགས་པོ་ དང་ ཁ་ཤས་ གཟིགས་རུང་
སྣང་མེད་ བཏང་བོ་ གནང་འདུག་ གན་ར་ ཨིན་རུང་ ད་འོངས་ མཁན་ ལོ་ ནང་ལོ་ ལྷན་རྒྱས་ ཐམས་ཅད་ཀྱིས་ བརྒྱ་ཆ་ བརྒྱ་ཀིས་ མཁན་འདིས་ ལག་ལེན་ གནང་ཚུགས་པའི་ རེ་ཆེ་ ང་ཅག་ བཀྲ་སྡིངས་
དགོན་གྱི་ འདུས་སྤྱིས་ བྱ༹ས་ཤད་ཨིན་ནོ།
དེ་ར་བྱ༹ས་སྟི་
དུས་ཆིག་ གཞུང་འབྲེལ་ མིན་པའི་ འགྱེར་ཚོགས་NGO ཁག་གི་ དད་ལྡན་ མི་མང་ཡོང་ལོ་ གསོལ་ཇ་ ཕུལ་བའི་ ལས་རིམ་ གནང་མཁན་ ཚོགས་པོ་ ཐམས་ཅད་ལོ་ ཐུགས་རྗེ་ཆེ་ ཞུ་ཤད་ དང་ མ་འོངས་པའི་ ནང་ལོ་ ལས་རིམ་ བཟང་པོ་ མུ་ཐུད་སྟི་ གནང་བའི་ རེ་བ་ བཞག་ཅན་ རང་ ཁོང་ ལྷན་རྒྱས་ ཙུ་ལོ་ སྙན་གསན་ ཁ་ཤས་ ཞུ་ཤད་གཅིག་ལོ་ གསོལ་ཇ་ དྲངས་བའི་ སྐབས་ལོ་ ལྷག་པར་གྱི་ གྱིག་ཤོག་ ཞལ་ཀ་ Plastic cup or Thormocal cup etc.
བེད་སྤྱོད་ ཉུང་ཉུང་ གནང་ཤད་ དང་ གསོལ་ཇ་ དྲངས་བའི་ སྐབས་ལོ་ མི་མང་ལོ་ ཐུགས་ཕན་ གསོས་པའི་ དོན་ལས་ “ལྷན་རྒྱས་ཙུ་ ཞལ་ཀ་ འདི་ གཙོག་ཀོ་ བླུགས་སའི་ སྣོད་ཙུ་(Please use the Dustbin) ནང་ལོ་ བླུགས་ཀོ་ གནང་ན་སེ་
ཞུས་ཤད་ཨིན” འདེ་མ་ ཞུས་ན་ མི་མང་ ཆེ་ཤོག་ ཅིག་གིས་ ག་ཐོབ་ བཞག་ཀོ་ སྦད། འདི་ འདེམ་ དོན་ཚན་ བཟང་པོའི་ དོན་ལོ་ ལྷན་རྒྱས་ ཐམས་ཅད་ཀྱི་ རོགས་རམ་ དང་ རྒྱབ་སྐྱོར་ གནང་དགོས་པོ་ གལ་ཆེན་ ཨིན། ལྷན་རྒྱས་ ཐམས་ཅད་ཀྱི་ ཐུགས་རྗེ་ བཀའ་དྲིན་ལས་ དུས་ཅིག་ བུམ་ཆུ་ སྐབས་ལོ་ རྟག་དང་ རྟེན་འབྲེལ་ བཟང་དྲགས་ ཐོན་འདུག ད་འོང་མཁན་ ལོ་ ནང་ལོ་ དད་ལྡན་ ཐམས་ཅད་ སྐུ་ཚེ་ལོ་ བར་ཆད་ མེད་པོ་ བཀྲ་ཤིས་ གཡང་ཆགས་ཉེ་ ཡོད་པའི་ སྨོན་ལམ་ཙུ་ ཞུ་བཞིན་ལས་ སང་ཕོད་ ལོག་སྟི་ར་ འདེ་ར་ མཇལ་བའི་ རེ་བ་སྦོམ་པོ་ བཞག་ཅན་ ལྷན་རྒྱས་ ཡོངས་ལོ་ ཐུགས་རྗེ་ཆེ་ཆེ་
ཞུ།།
ཐུབ་བསྟན་དཔལ་བཟང་།
Subscribe to:
Posts (Atom)