ཆོས་འཁོར་ དུས་ཆེན།

སངས་རྒྱས་ མངོན་པར་ རྡོ་རྗེ་གདན།

ཞག་པོ་ བདུན་ཕྲག་ བདུན་ཟངས་ལོ།

ཟབ་རྒྱས་ ཆོས་ཀྱི་ ཕུང་པོ་འདི།

ཚིག་གི་ བདུད་རྩི་ མ་གསུང་བར།

དམ་བཅའ་ བཞེས་པའི་ དུས་ཚོད་ན།

ལྷ་རྒྱལ་ ཚངས་པོ་ བརྒྱ་བྱིན་གྱིས།

གསོལ་བ་ འདེབས་པར་ ཆོས་འཁོར་ལོ།

དམ་བཅའ་ ནང་ལས་ བཞེང་སྟི་ཀིས།

ཆོས་འཁོར་ དུས་བཟང་ གཟིགས་སྟི་ཀི།

ཝ་ར་ དྲང་སྲོང་ ནགས་ཕྱོགས་ལོ།

ལྔ་སྡེ་ ལྷ་ཁྲི་ སེམས་ཅན་ལོ།

ཆོས་ཀྱི་ འཁོར་ལོ་ བདེན་བཞི་གསུང་།

སོ་ལྔ་ ཟླ་དྲུག་ ཚེས་བཞི་ལོ།

བདེན་བཞི་ ཐོབ་པའི་ དགྲ་བཅོམ་སོགས།

ལྷ་དང་ འགྲོ་བ་ བདེན་མཐོང་ལས།

ཆོས་འཁོར་ དུས་བཟང་ མཁྱེན་བོ་གནང་༎

༼ངས་ བསམ་འཆར་ དྲུག་པ་ ཚེས་བཞི་ དུས་ཆེན་ འདི་ནང་ལོ་ ང་ཅག་ འབྲས་ལྗོངས་ལོ་ ཆོས་བཤད་ཀྱི་ དོན་ལས་ ཐུགས་བསམ་ གནང་དགོས་པོ་ འདུག་ མ་འོངས་པོ་ན་ ཆོས་བཤད་ བྱ༹ས་བའི་ ལུགས་སྲོལ་ བཟོ་དགོས་པོ་ འདུག  ད་ལྟ་ཟངས་ མིན་འདུག་ དམིགས་བསལ་གྱི་ དྲུག་པ་ ཚེས་བཞི་ སྐབས་ལོ་ འདི་ ང་ཅག་ ཐམས་ཅད་ཀྱི་ ཐུགས་དོན་ གནང་དགོས་ ཞུ།༽

ཐུབ་བསྟན་དཔལ་བཟང་གིས།

ཐུབ་བསྟན་ དཔལ་བཟང་།

འབྲས་ལྗོངས་ཀྱི་ ལྷོ་སྐད།

༈ འབྲས་ལྗོངས་ཀྱི་ ལྷོ་སྐད་ ཚོགས་པོ་ གཞི་བཙུགས་ དགོས་པོའི་ དམིགས་ཡུལ་ ནེ།

༈ སྦས་ཡུལ་ འབྲས་མོ་ ལྗོངས་ལོ་ བཞུགས་པའི་ ལྷོ་པོའི་ མི་རིག་ཙུའི་ རིག་གཞུང་ དང་ ལོ་རྒྱུས་ ཀེས་པོ་ ཡོད་པོ་ ཨིན། འདིའི་ ནང་ལས་ རང་གི་ སྐད་ལོ་ ཡར་རྒྱས་ རྒྱ་ཆེ་དྲགས་ བྱ༹ས་དགོས་པོ་ ལེབ་སྟི་ གལ་ཆེན་པོ་ གཅིག་ ཨིན་ཟང་ འབྲས་ལྗོངས་ཀྱི་ ལྷོ་སྐད་ ལབ་མཁན་ གདོང་དེབ་ ཚོགས་པོ་ གཅིག་ བཟོ་བོ་ ཨིན། འབྲས་ལྗོངས་ཀྱི་ ལྷོ་སྐད་ ལབ་མཁན་ ཚིག་ གསར་པོ་ གཅིག་ཡང་ མན་ དེ་ཟང་ འདི་ བེད་སྤྱོད་ མ་ཡ་ ཤད་ བྱ༹ས་སྟི་ ཚིག་གསར་ འདེམ་གཅིག་ མཐོང་བོ་ ཨིན། གན་ཨིན་རུང་ འབྲས་ལྗོངས་ཀྱི་ ལྷོ་སྐད་ ཚོགས་པོ་ གདོང་དེབ་ནང་ལོ་ བཟོ་དགོས་པོ་ དམིགས་དོན་ གཙོ་བོ་ གན་བོ་ སེ་ན་ ང་ཅག་ ཐམས་ཅད་ དེང་སང་ འཕྲུལ་ཆས་ དང་ སྤྱི་ཚོགས་ལོ་ ཕན་པའི་ དྲ་རྒྱ་ཙུ་ ཀེས་པོ་ ཡོད་པོའི་ ནང་ལས་ གདོང་དེབ་ འདི་ ཕན་ཏོགས་ སྦོམ་པོ་ གཅིག་ཐོན་ ཡོད་པོ་ ཨིན། ཚོགས་པོ་ འདི་ སྤྱི་ལོ་ ༢༠༡༡ ཟླ་བ་༨་ ཚེས་༡༨་ ཉིན་ལོ་ འབྲས་ལྗོངས་ཀྱི་ རྒྱལ་ས་ གཉིས་པོ་ རྒྱལ་ཞིང་ ནུབ་ འབྲས་ལྗོངས་ ས་གནས་ ལ་སྒང་ ལབ་ས་ ལས་དབང་གི་ འབྲས་ལྗོངས་ གཞུང་གི་ རྒྱལ་ཞིང་ མཐོ་རིམ་ སློབ་གྲྭའི་ སློབ་དཔོན་གྱི་ གོ་གནས་ ཐོབ་སྟི་ སྡོད་པའི་ སྐབས་ལོ་ གདོང་དེབ་ ཉིན་རེ་ བཞིན་ བེད་སྤྱོད་ བྱ༹ས་བཞིན་ ཡོད་པའི་ དུས་བཟང་ གཅིག་ན་ལོ་ ངའི་ སེམས་ནང་ལོ་ རང་གི་ མི་རིགས་ ཉམས་པུ་ འབྲེལ་བ་ བྱ༹ས་ཤད་ དྲ་རྒྱ་ནང་ལོ་ འཚོལ་བའི་ སྐབས་ལོ་ གཅིག་ཡང་ ཐོབ་མ་ཚུགས་ས་ལས་ ངའི་ སེམས་ནང་ལོ་ ད་ དུས་བཟང་ འཕྲུལ་ཆས་ཀྱི་ ཉིན་ལོ་ ཚོགས་པོ་ གཅིག་བཟོ་སྟི་ འདི་ནང་ལོ་ ང་ཅག་ ལྷོ་པོའི་ དོན་ལས་ གན་ཡང་ ཐོབ་ཚུགས་ མཁན་ཚོགས་པོ་ གཅིག་བཟོ་ཤད་ཀྱི་ ཐག་ཆད་ བྱ༹ས་བོ་ ཨིན། འདི་སྐབས་ལོ་ ཚོགས་པོ་ འདིའི་ མིང་འདི་ གན་བཞག་ དགོས་པོ་ སེམས་ནང་ལོ་ ཤར་བོ་ དང་ མཉམ་གཅིག་ འབྲས་ལྗོངས་ཀྱི་ ལྷོ་སྐད་ ལབ་སྟི་ མིང་ ཐོབ་ས་ ལམ་ཀྱང་ དང་པོ་ གདོང་དེབ་ ཚོགས་པོ་ (Denjongke Lho kay, facebook group) གཅིག་ བཟོ་བོ་ ཨིན། ཨོ་ན་ལས་ ཚོགས་པོ་ ནང་ལོ་  འཐུས་མི་ རེ་རེ་བཞིན་ བྱ༹ས་སྟི་ ད་ལྟ་ཟང་ འབྲས་ལྗོངས་ཀྱི་ ལྷོ་སྐད་ ཚོགས་པོ་ ནང་ལོ་ འཐུས་མི་ ༡༢༠༠༠ ལས་ལྷག་ཚད་ ཡོད་པོ་ ཨིན། འདི་ འདྲ་བྱ༹ས་སྟི་ འབྲས་ལྗོངས་ཀྱི་ ལྷོ་སྐད་ཚོགས་པོ་ འདི་ གདོང་དེབ་ ཚོམ་བུ་ DLK Facebook Group དགོང་དེབ་ ཤོག་ཀུ་ DLK Facebook page, གུ་གུལ་ནང་ བྷོ་ལོཊ་ Google+Blog DLK འོཊ་ཨེབ་ WhatsApp DLK དང་ ཡུ་ཌུབ་ཙུ་ Youtube DLK  ཨེན་ས་ཊ་ག་རམ Instagram DLK ནང་ལོ་ འབྲས་ལྗོངས་ཀྱི་ ལྷོ་སྐད་ ཚོགས་པོ་ བཟོ་ ཡོད་པོ་ ཨིན། འདི་ཙུ་ ནང་ལོ་ བཟོ་དགོས་པོ་ རྒྱུ་མཚན་ གན་ཨིན་སེ་ན་ ང་ཅག་གི་ ལྷོ་པོའི་ སྐད་རིགས་ དང་ འབྲེལ་བ་ ཡོད་པའི་ མཁོ་ཡོད་པའི་ པར་རིག་ དང་ གླུ་གཞས་སོགས་ ཐོབ་ཚུགས་ཤད་ ཨིན། འདི་ དང་ འདྲ་བོ་ བྱ༹ས་སྟི་ ལྷོ་པའི་ སློབ་ཕྲུག་ཙུའི་ དོན་ལས་ རྩོམ་ཤོག་ཙུ་ ཐོབ་ལམ་ བྱ༹ས་ཡོད་པོ་ ཨིན། འདི་དང་ འདྲ་བོ་ བྱ༹ས་སྟི་  རིག་གཞུང་ ལྡན་པོ་ པར་ཙུ་ ཡང་ ཕན་ཏོག་ སྦོམ་པོ་ ཡོད་པོ་ དང་ ལྟག་པར་ འབྲས་ལྗོངས་ ལྷོ་པའི་ མི་རིགས་ཙུའི་ ཕྱག་ལས་ དང་ མི་གཏམ་ཙུ་ ཐོན་ཡོད་པའི་ ཕྱག་ལས་ དང་ ལོ་རྒྱུས་ཙུ་ཡང་ ཁྱབ་འཕེལ་ བྱ༹ས་བཞིན་པོ་ ཨིན། འདེས་ བྱ༹ས་དགོས་པོའི་ རྒྱུ་མཚན་ གཙོ་བོ་ནེ་ ལྷོ་པའི་ མི་རིགས་ཙུ་ གཅིག་ཅིག་ལོ་ ངོ་ཤེས་ཚུགས་པོ་ དང་ གཅིག་ཅིག་ལོ་ ཕན་ཏོགས་ དང་ རོམ་རམས་ སྦོམ་པོ་  ཐོན་ཤད་ ཡོད་པོ་  ཨིན།།

འབྲས་ལྗོངས་ཀྱི་ ལྷོ་སྐད་ ཚོགས་པའི་ ད་ལྟ་ཟང་ གཡོག་ཙུ་ གན་གན་ བྱ༹ས་བཞིན་པོ་ དང་ བྱ༹ས་ཡོད་པོ་ཙུ་ ནེ།

དང་པོ་ རང་གི་ སྐད་རིག་ ཡར་རྒྱས་ཀྱི་ དོན་ལས་ ཉིན་རེ་ བཞིན་ ཚིག་རེ་རེ་ གདོང་དེབ་ ཚོགས་པོ་ཙུ་ ནང་ལོ་ སླབ་བྱི༹ན་དོ་ ཨིན། གཉིས་པོ་ ཚོགས་པའི་ འཐུས་མི་ཙུ་ཀིས་ ལྷོ་སྐད་ ཉིན་ལབ་སྟི་ རེ་གཟའ་ ཉི་མ་ལོ་ རང་སྐད་ སྐྱབས་དགོས་པོ་ ལབ་སྟི་ བཟོཽ་ཡོད་པོ་ ཨིན། གསུམ་པོ་ ལོ་ལྟར་ འབྲས་ལྗོངས་ ལྷོ་པའི་ གྱོན་ཆས་ཀྱི་ སྐོར་ལས་ བདུན་ཕྲག་ དང་ ཟླ་བོ་ ལབ་བཟོ་ ཡོད་པོ་ ཨིན། བཞི་པོ་ ལོ་ལྟར་ སྐྱེ་སྟོབས་ རིག་རྩལ་ ཡང་ ལྷོ་པོའི་ གླུ་གཞས་ཙུ་ གཟུགས་མཐོང་ གློབ་བརྙན་ ཐུང་ཐུང་བྱ༹ས་སྟི་ བཟོ་སྟི་ འགྲན་སྡུར་ བྱ༹ས་དོ་ ཨིན། ལྔ་པོ་ ལྷོ་པའི་ སྙན་རྩོམ་ འགྲན་སྡུར་ཙུ་ གཞི་འགོ་ ཕྱི་ལོ་ ༢༠༡༨་ལས་ བཙུགས་ཡོད་པོ་ ཨིན། འདི་ འདྲ་བོ་ མ་འོངས་པའི་ སྐད་རིག་ ཡར་རྒྱས་ དང་ སྤྱི་ཚོགས་ཀྱི་  དོན་ལས་ འཆར་གཞི་ཙུ་ ཀེས་པོ་ཙུ་ བཙུགས་ཤད་ ཡོད་པོ་ འདི་ནང་ མཁས་དབང་ ལྷན་རྒྱས་ དང་ རྒྱུ་འབྱོར་ སྟོབས་ལྡན་ གཞོན་བོ་ ལྷན་རྒྱས་ཙུ་ལོ་ མ་འོངས་པོ་ འཆར་གཞི་ལོ་ ཐུགས་གནང་ རྒྱ་ཆེ་དྲགས་ གནང་བའི་ རེ་བ་ སྦོམ་པོ་ བཞག་བཞིན་ འབྲས་ལྗོངས་ཀྱི་ ལྷོ་སྐད་ འཐུས་མི་ དང་ རྒྱབ་སྐྱོར་ གནང་མཁན་ ལྷན་རྒྱས་ ཐམས་ཅད་ གང་པོ་ལོ་ སོར་བཅུ་ པད་མའི་ འདབ་མ་ སྙིང་ཁར་ བཀོད་སྟི་ སྙིང་ལས་ར་ ཐུགས་རྗེ་ཆེ་ཆེ་ ཞུ་དོ་ ཨིན་ནོ༎  ༎

༄༅། ། སྙིགས་དུས་ རྒྱལ་བ་ དངོས་འདྲའི་ མཛད་པ་ཅན། ཐུགས་རྗེ་ བཀའ་དྲིན་ ཚད་མེད་ རྒྱལ་བས་ལྷག  ཡང་དག་ དགེ་བའི་ བཤེས་གཉེན་ མ་བརྟེན་ན། དམུས་ལོང་ དམིགས་སུ་ མེད་པ་ ལམ་ཞུགས་འདྲ། དཔལ་སྤྲུལ་རིན་པོ་ཆེན་པས།

མཐའ་དག་ ཡོན་ཏན་ རྫོགས་པའི་ བླ་མ་ནི། སངས་རྒྱས་ ཀུན་གྱི་ ཐུགས་རྗེ་ ཡེ་ཤེས་ཁྱབས།

གདུལ་བྱའི་ ཡུལ་ལ་ སྐྱེས་བུའི་ གཟུགས་ཀྱི་ བྱོན། དངོས་གྲུབ་ ཀུན་གྱི་ རྩ་བ་ བླ་ན་མེད། ཞེས་སོ།

དཔལ་ལྡན་ རྩ་བའི་ བླ་རིན་པོ་ཆེ། བདག་གི་ སྙིང་གར་ པདྨའི་ གདན་བཞུགས།

བཀའ་དྲིན་ ཆེན་པོའི་ སྒོ་ནས་ རྗེས་བཟུང་སྟེ། སྐུ་གསུངས་ ཐུགས་ཀྱི་ དངོས་གྲུབ་ རྩོལ་དུ་ གསོལ།།

རབ་བྱུང་༡༧ རབ་གནས་ མེ་མོ་ བྱ་མོའི་ ཟླ་བ་༢་ ཚེས་༧་ བོད་རྒྱལ་ལོ་ ༢༡༤༤ སྟོན་པོའི་ འདས་ལོ་ ༢༥༦༡ ཕྱི་ལོ་༢༠༡༧ ཟླ་བ་༤་ ཚེས་ ༣་ ཉིན་ལོ་ གནས་ཆེན་ བྲག་དཀར་ བཀྲ་ཤིས་ སྡིངས་ཀྱི་ དགོན་ཆོས་ སློབ་གྲྭ་ རིག་གཞུང་ དགའ་ཚལ་ སློབ་གྲྭའི་ སློབ་དཔོན་ ཆེན་པོ་ རིག་ དང་ དཀྱིལ་འཁོར་ རྒྱ་མཚོའི་ ཁྱབ་བདག་ འཁོར་ལོའི་ མགོན་པོ་ རྗེ་བཙུན་ བླ་མ་ བཀའ་དྲིན་ གསུམ་ལྡན་ ལྡན་ཆེན་པོ་ ༼དོན་གྱིས་སླད་དུ་ མཚན་བརྗོད་ན༽ སློབ་དཔོན་ དགེ་སློང་ ལྷུན་གྲུབ་ མཆོག་ལོ་  སློབ་ཕྲུག་ཙུ་ དང་ དད་ལྡན་ མི་མང་ཙུ་ཀིས་ ཉིན་གཅིག་གི་ ལས་རིམ་ བཀྲ་ཤིས་པའི་ དགའ་སྐྱེལ་ ཤིས་བརྗོད་ཀྱི་ རྟེན་འབྲེལ་ བཟང་པོ་ འདི་ རིག་གཞུང་ དགའ་ཚལ་ སློབ་གྲྭའི་ ཚོགས་ཁང་ སྦོམ་པོ་ ནང་ལོ་ ཚོགས་པོ་ གནང་བོ་ ཨིན།  འདི་ སྐབས་ལོ་ བྱོན་བོ་ གནང་མཁན་ མགྲོན་པོ་ གཙོ་བོ་ སློབ་དཔོན་ དགེ་སློང་ ལགས་ ཆོས་ཁྲིམས་པོ་ རྡོ་ཅུང་ སློབ་ཕྲུག་ རྒན་གཞོན་བར་གསུམ་ ཨ་ཞི་ ནག་ཀུམ་ ནང་མི་ དང་ བཀྲ་ཤིས་སྡིངས་ཀྱི་ མི་མང་བཅས་ ཞལ་འཛོམས་ ཐོག་ལས་ དགའ་སྐྱེལ་ ཤིས་བརྗོད་ཀྱི་ རྟེན་འབྲེལ་ དབུ་གཙུགས་ གནང་བོ་ ཨིན།

དགའ་སྐྱེལ་ ཤིས་བརྗོད་ཀྱི་ དགའ་སྟོན་ ཆེན་པོའི་ མཛད་རིམ།

༡༽ སློབ་ཕྲུག་ཙུ་ དང་ མགྲོན་པོ་ཙུ་ ཞལ་འཛོམས་  གནང་བོ་ ཨིན།

༢༽སློབ་དཔོན་ལགས་ལོ་ ཕེབས་བསོ་ སློབ་དཔོན་ རྣམ་གྲོལ་ལགས་ དབུ་ཁྱིགས་ གནང་བོ་ ཨིན།

༣༽མགྲོན་པོ་ གཙོ་བོ་ མར་མེ་ ཕུལ་བོ་ ཨིན། ཚོགས་ཆུང་གིས་ མཇལ་དར་ ཕུལ་བོ་ ཨིན།   

༤༽ སློབ་ཕྲུག་ཙུ་ཀིས་ བཀྲ་ཤིས་ བརྒྱད་པོ་  གསུང་བཤད་ གནང་བོ་ ཨིན།  

༥༽བྱོན་བ་ ལེགས་སོའི་ གསུང་བཤད་ སློབ་དཔོན་ སེངྒེ་ དབང་ཕྱུག་གིས་ གནང་བོ་ ཨིན།

༦༽སློབ་དཔོན་ སྐུ་ཚེའི་ མཛད་ཕྲིན་ སྐོར་  སློབ་དཔོན་ དངོས་གྲུབ་གྱིས་ གསུང་བཤད་ གནང་བོ་ ཨིན།

༧༽འབུལ་ཚན་ དང་ མཇལ་དར་སོགས་ ཕུལ་བོ་ གནང་བོ་ ཨིན།

༨༽ བློ་འདོད་ བཞིན་ སློབ་དཔོན་ལོ་ ཤིས་བརྗོད་སྐོར་ལོ་ གསུང་བཤད་ ཆོས་ཁྲིམས་པོ་ དང་ སློབ་དཔོན་ རྣམ་གྲོལ་གྱིས་ སྔོན་གྱི་ སློབ་གྲྭའི་ སྐོར་ གསུང་བོ་ གནང་བོ་ ཨིན།

༩༽སློབ་ཕྲུག་ཙུའི་ གླུ་དབྱངས་ཀྱི་ མཆོད་པ་ གླུ་ཁང་ ཁྲ་མོའི་ དང་ བྱང་ འདི་ རྣམ་མཚོ་ དཀར་མོ་ གསུང་ གླུ་ གསུང་བོ་ ཨིན།

༡༠༽བཀའ་དྲིན་ གསུམ་ལྡན་ དགེ་བའི་ བཤེས་གཉེན་ ཆེན་པོའི་ བཀའ་སློབ་ གནང་བོ་ ཨིན།

༡༡༽བཀྲ་ཤིས་ ལེགས་པའི་ གླུ་དབྱངས་ཀྱི་ མཆོད་པོ་ བཀྲ་ཤིས་ བཀྲ་ཤིས་ གསུང་བོ་ ཨིན།   

༡༢༽ཐུགས་རྗེ་ ལེགས་ཕུལ་གྱི་ གསུང་བཤད་ སློབ་དཔོན་ ཟླ་བ་ རྣམ་རྒྱལ་གྱིས་ གསུང་བོ་ ཨིན།

༡༣༽བསྟན་རྒྱས་ སྨོན་ལམ་ གནང་བོ་ ཨིན།

༡༤༽ཞལ་འཛོམས་ སྐུ་པར་ རྐྱབས་པོ་ གནང་བོ་ ཨིན། 

༡༥༽ཞལ་ལགས་ རིམ་པོ་  མགྲོན་ཁང་ གདན་ཞུ་བོ་ གནང་བོ་ ཨིན།

སློབ་དཔོན་ལགས་ལོ་ མཎྜལ་ མཚོན་བྱེད་ ཧིན་སྒོར་ ༣༥༣༣༠ དང་ གསེར་ཟངས་ལས་ གྲུབ་པའི་ ཚེ་སྐུ་ གཅིག་ འབྲས་གྱོད་གང་ མར་ཆུ་ར་ འོ་མ་ གློག་འཕྲུལ་ དང་ དར་བཅས་ འབུལ་མཚན་ བཟང་བོ་ ལེགས་པར་ ཕུལ་བོ་ ཨིན། འདི་ནང་བཞིན་ སློབ་དཔོན་ལགས་ཀྱི་ ཞབས་སྐྱེལ་ ལས་རིམ་ དོན་ཚན་ བཅོ་ལྔ་ནང་ ལེགས་པར་ ཤིས་པར་ གྲུབ་པར་ མཛད་པོ་ ཨིན་ནོ།།

 ཐུབ་བསྟན་དཔལ་བཟང་གིས།།

དཔེ་དེབ་ བསྐྱར་ཞིབ།

གཞོན་ནུ་ ཤེས་འདོད་ ཅན་གྱི་ དྲང་གཏམ་ ལྟ་སའི་ མེ་ལོང་ བཞུགས་སོ།

རྩོམ་པ་པོཿ དངོས་གྲུབ་ འབྲས་ལྗོངས་པོ།

ཕྱི་ལོ་   ༢༠༡༧ ཟླ་བ་ ༠༤་ ཚེས་ ༡༧

སློབ་སྟོན་པོཿ སློབ་དཔོན་ འཇིག་མེད་ དབང་ཕྱུག

དེབ་བསྐྱར་ ཞིབ་པོཿ ཐུབ་བསྟན་ དཔལ་བཟང་། ཨང་གྱངསཿ 16MBH020

ལྷོ་སྐད་ ལེ་ལག་ སྡེ་ཚན།

དབུས་གཞུང་ འབྲས་ལྗོངས་ གཙུག་ལག་ སློབ་གཉེར་ ཁང་། ཤར་ འབྲས་ལྗོངས།

སྟོན་པའི་ འདས་ལོ། ༢༥༦༡                                                      ཕྱི་ལོ་ ༢༠༡༧

དཔེ་དེབ་ བསྐྱར་ཞིབ།

࿑ དེབ་མིངཿ  གཞོན་ནུ་ ཤེས་འདོད་ ཅན་གྱི་ དྲང་གཏམ་ ལྟ་སའི་ མེ་ལོང་ བཞུགས་སོ། རྩོམ་པ་པོཿ དངོས་གྲུབ་ འབྲས་ལྗོངས་པོ། དཔར་འགྲེམས་པ་པོཿ བཀྲ་ཤིས་ རྡོ་རྗེ། ཕྱི་ལོཿ ༢༠༠༨ པར་ཐེང་ དང་པོ། ཤོག་གྱངསཿ ༤༦  དཔེ་དེབཿ དེབ་གཟུགས། རིན་ བྲི་ མིན་ འདུག རྒྱལ་སྤྱིའི་ དེབ་ཀྱི་ ཨང་གྱངསཿ གསལ་མེད་ འདུག

དེབ་རྩོམ་པ་པོའི་ ལོ་རྒྱུས་ མདོར་བསྡུས་ནེ།

དངོས་གྲུབ་ འབྲས་ལྗོངས་པོ་ ཕྱི་ལོ་ ༠༢་ ༠༦་ ༡༩༨༠ ལོར་ གནས་ཆེན་ བྲག་དཀར་ བཀྲ་ཤིས་ སྡིངས་སུ་ ཡབ་ སངས་རྒྱས་ སྲུང་ དང་ ཆུང་ཆུང་ གཉིས་ཀྱི་ སྲས་ བར་པོ་ སྐུ་འཁྲུངས། ཁོང་གི་ གཞི་རིམ་ ཤེས་ཡོན་ དགོན་ཆོས་ སློབ་གྲྭ་ བྲག་དཀར་ བཀྲ་ཤིས་ སྡིངས་ རིག་གཞུང་ དགའ་ཚལ་ སློབ་གྲྭ་ལོར་ ལོ་ངོ་ དྲུག་ཙམ་ ཤེས་ཡོན་ སྦྱང་བོ་ གནང་འདུག འདི་ལས་ མཁན་ཆེན་ ལྷ་ཚེ་རིང་གི་ ཞབས་འོག་ཏུ་ ལོ་ངོ་ ཁ་ཤས་ གཅིག་ སློབ་བརྩོན་ གནང་འདུག  རྗེས་ལོ་ འབྲས་ལྗོངས་ སྔ་འགྱུང་ རྙིང་མའི་ བཤད་གྲྭའི་ ནང་ལོ་ ལོ་རིམ་ དགུ་པར་ སློབ་པ་ མཐར་ཕྱིན་ནས་ བཤད་གྲྭ་ནང་ལོ་ སློབ་དཔོན་ཆེན་པོའི་ གཞུང་ཞབས་ གནང་བཞིན་པོ་ ཨིན། ཁོང་གི་ ད་ལྟ་ ཟངས་ ལྷོ་རིག་ སྐོར་ལས་ ཕྱག་ལས་ གནང་བཞིན་པོ་ གནང་ཡོད་པའི་ མཛད་བྱ་ ནེ། ལྷོ་པོའི་ དེབཿ དང་པོ་ གཞོན་ནུ་ ཤེས་འདོད་ ཅན་གྱི་ དྲང་གཏམ་ ལྟ་སའི་ མེ་ལོང་ བཞུགས་སོ། རི་དྭགས་ཀྱི་ གཏམ་ ངེས་འབྱུང་གི་ ཕོ་ཉ། སྙན་ངག་གི་ འཛུལ་སྒོ་ མེ་ལོང་གི་ གཟུགས་བརྙན་ བཞུགས་སོ། མཐུན་པ་ སྤུན་བཞི་ ལོ་རྒྱུས་སོགས་  བྲི་རྩོམ་ ཀེས་པོ་ བྲི་བོ་ གནང་བཞིན་ འདུག  གློ་རིག་ སྐོར་ལོ་ ཞུ་ནཿ  སྙིང་གཏམ་ གློག་བརྙེན་ གཅིག་ཡང་ བཟོ་བོ་ གནང་འདུག  འབྲས་ལྗོངས་ ལྷོ་པའི་ གསུངས་གླུ་ ཡང་ ཀེས་པོ་ གཅིག་ བྲི་བོ་ གནང་འདུག  ཕབ་བསྒྱུར་སྐོར་ འབྲས་ལྗོངས་ རྒྱལ་རབས། ས་སྐྱ་ལེགས་བཤད་སོགས་ ཡོད་པོ་ ཨིན། ཁོང་གི་ ཕྱག་ལོ་ གཟིགས་ནང་ ད་རུང་ ཀེས་པོ་ གཅིག་ གནང་བཞིན་པོ་ ཡོད་པོ་ ཨིན་ནོ༎

དེབ་ འདིའི་ བརྗོད་དོན་ གཙོ་བོ་ ནེ།

དེབ་ འདིའི་ དམིགས་ཡུལ་ གཙོ་བོ་ གན་ ཨིན་ན་ སེ་ན་ འབྲས་ལྗོངས་ ལྷོ་པའི་ རིག་གཞུང་ ལུགས་སྲོལ་ སྟེང་ལོ་ དོ་སྣང་ གནང་མཁན་ ཙུའི་ དོན་ལས་ ཚིག་བཅད་ ཧོང་ལས་ རྩོམ་པོ་ ཡོད་པོ་ གཅིག་ འདུག  འདི་ནང་ལོ་ དོན་ཚན་ ཡང་ན་ ལེའུ་ ཚན་ བཞིའི་ ཁོངས་རྟོགས་ལོ་ བཀོད་ གནང་ འདུག

དང་པོཿ སྦས་ཡུལ་ འབྲས་མོ་ ལྗོངས་ཀྱི་ ལོ་རྒྱུས་ དང་ འབྲེལ་བའི་ བསྟོད་པོ།

གཉིས་པོཿ རིན་ཐང་ བྲལ་བའི་ རང་གི་ རིག་གཞུང་།

གསུམ་པོཿ ཡུལ་གྱི་ ཁྱད་ཆོས་ སྙན་པའི་ ཚིག་རྒྱན།

བཞི་པོཿ སྦྱིན་པོ་ བཏང་ དགོས་པོ་ དང་ བཞིའོ༎

དེབ་ འདིའི་ སྔ་ཕྱིའི་ སྒྲིག་རིམ་ནེ།

དང་པོ་ སྦས་ཡུལ་ འབྲས་མོ་ ལྗོངས་ཀྱི་ ལོ་རྒྱུས་ དང་ འབྲེལ་བའི་ བསྟོད་པོའི་ སྐབས་ལོ་ ཚིག་བཅད་ བཞིན་ འབྲས་ལྗོངས་ལོ་ གུ་རུ་ རིན་པོ་ཆེའི་ བྱིན་རླབས་ཚུལ་  ཆ་རབས་ དང་ བསྟན་པོ་ སྔ་བར་ཕྱི་ གསུམ་གྱི་ བསྟན་པོ་ དར་ཚུལ་ འབྲས་ལྗོངས་ཀྱི་ རྒྱལ་བརྒྱུད་ ཆད་ཚུལ་སྐོར་་སོགས་པོ་ རྒྱས་པོ་ བྱ༹ས་སྟི་ བྲི་བོ་ གནང་ འདུག  འདི་ སྙན་རྩོམ་ ཐེངས་གཅིག་ གཟིགས་ཚུགས་ན་ འབྲས་ལྗོངས་ཀྱི་ ལོ་རྒྱུས་ཙུ་ ཤེས་ཚུགས་ པད།

གཉིས་པོ་ རིན་ཐང་  བྲལ་བའི་ རང་གི་ རིག་གཞུང་གི་ སྐབས་ལོ་ མི་རིག་ རང་རང་སོ་སོའི་ རང་གི་ རིག་གཞུང་ འདི་ གལ་ཆེན་པོ་ དང་ མི་ཉམས་པོ་ བྱ༹ས་སྟི་ སྲུང་དགོས་པོའི་ སྐོར་ གསུངས་བོ་ གནང་ འདུག

གསུམ་པོ་ཡུལ་གྱི་ ཁྱད་ཆོས་ སྙན་པའི་ ཚིག་རྒྱན་སེ་ ལབ་པའི་ ཚིག་བཅད་ ནང་ལོ་ སྦས་གནས་ཀྱི་ ཁྱད་པར་ཅན་ དང་ མཛེས་དྲགས་ དང་ མཐར་སྐོར་ ནང་ལོ་ གནས་ཡོད་པའི་ ཡུལ་གྱི་ སྐོར་ལོ་ གསུངས་བོ་ གནང་འདུག

བཞི་པོ་ སྦྱིན་བོ་ བཏང་ དགོས་པོ་ སྐོར་ནང་ལོ་ སྦྱིན་བོ་ བཏང་སྟངས་ཀྱི་ སྐོར་ དང་ སྦྱིན་བོ་ བཏང་བའི་ ཕན་ཡོན་ དང་ བཏང་དགོས་པོའི་ སྐོར་ གསུངས་འདུག

དེབ་ འདི་ནང་ལས་ བསྐྱར་ཞིབ་ བྱ༹ས་བའི་ སྐབས་ལོ་ རྐྱོན་བརྗོད་ ཟུར་ཙམ་ བཀོད་ནེ།

དེབ་ འདི་ནང་ལས་ ལེའུ་ ཚན་ བཞི་ བཀོད་ཡོད་ འདུག་ འདི་ནང་ལས་ ད་ལྟ་ ཚིག་བཅད་ ཀེས་པོ་ ཅིག་ནང་ལས་ ཀ་རྩོམ་ནང་ལོ་ བསྐྱར་ཞིབ་ བྱ༹ས་བོ་ བཞིན་ ཚིག་ ཁ་ཤས་ ཅིག་ མ་རྟོགས་ གཞན་ ཨོ་འདེམ་ ནོར་འཁྲུལ་ གན་ཡང་ དམིགས་གསལ་གྱི་ མེད་པོ་ བཞིན་འདུག  ཡང་ བསྐྱར་ཞིབ་གྱི་ དོན་ཚན་ལོ་ དམིགས་སྟི་ ཚིག་ ཁ་ཤས་ གཅིག་བརྗོད་ ནེ། ཡིག་ཕྲེང་ དང་པོ་ ནང་ལོ་ ཀ་མ་ཡི་་ བྲི་ཡོད་པོ་ འདི་ ལྷོ་ཡིག་ སྐབས་ལོ་ ཡི་ཚབ་ལོ་ ཀི་ དྲི་ཚུལ་ འདུག ཡིག་ཕྲེང་ གསུམ་པོའི་ སྐབས་ལོ་ འདི་ཀྱི་ བྲི་འདུག་ འདི་ཚབ་ལོ་ འདི་ཀི་ བྲི་ན་ ལེགས་བསམ།  ཚིག་བཅད་ གཉིས་པའི་ ཡིག་ཕྲེང་ གསུམ་པའི་ ནང་ལོ་ ཇ་འཆང་ བྲི་ འདུག  ཆང་གི་ དག་ཆ་ ནོར་འདུག ཚིག་བཅད་ བཞི་པའི་ ཡིག་ཕྲེང་ གསུམ་པའི་ སྐབས་ལོ་ ར་རུ་ཡི་ བྲི་འདུག  བ་ མེད་འདུག གཞན་ ཚིག་དོན་ བཟང་པོ་ འདུག དེབ་ འདི་ དེང་དུས་ཀྱི་ ལུགས་མཐུན་ མེད་འདུག  རྗེས་ལོ་ དེབ་ འདི་ པར་བསྐྲུན་ གནང་བའི་ སྐབས་ལོ་ ལུགས་མཐུན་ གནང་ནང་ན་ ལེགས་སོ༎

ང་གིས་ དེབ་ འདི་ནང་ལོ་ ཉམས་མྱོང་ སྐོར་ནེ།

སྤྱིར་ དེབ་ འདི་ དམིགས་གསལ་ འབྲས་ལྗོངས་ཀྱི་ ཆ་རབས་ ལོ་རྒྱུས་ཙུ་ ཤེས་ཚུགས་པོ་ འདུག  འདི་ དང་ འདྲ་བོ་ སྦྱིན་བའི་ བཏང་སྟངས་ སྐོར་སོགས་ ཧ་དགོས་ཚུགས་པོ་ པད།   འདི་ འདེམ་ མ་འོངས་པོ་ན་ ཀེས་པོ་ གཅིག་ ཡོད་དགོས་པོ་ དང་ གཞོན་པོ་ ཤེས་ཡོན་ཅན་ དང་ སློབ་བརྩོན་པོའི་ དོན་ལས་ ཕན་ཏོག་ རྒྱས་ཆེ་དྲགས་ ཡོད་པོ་ དང་ འབྲས་ལྗོངས་པོ་ སྐད་ ནང་ལོ་ ཡོད་ཤད་ བྱ༹ས་སྟི་  དགོས་བ་ཙུ་ འཇམ་བུ་ བྱ༹ས་སྟི་ ཤེས་པོ་ དང་ སླབ་བྱས་ཙུ་ཡང་ ཐོབ་ཚུགས་པོ་ འདུག  གཞོན་པོ་ ཐམས་ཅད་ཀྱི་ ཐེངས་གཅིག་ ག་ཚུགས་ སྒྲོགས་སྟི  གཟིགས་པོ་ གནང་ དགོས་སོ༎ །།

                                                             

འབྲས་ལྗོངས་ཀྱི་ ལྷོ་སྐད་ ཉམས་གསོ་ ག་ལྟེ་ བྱ༹ས་ དགོས།

༈ ཕ་བཟང་ དམ་པའི་ བུ་བརྒྱུད། ཕ་སྐད་ སྦྱོང་བོ་ གནང་དང་། མ་བཟང་ སྐྱེས་པའི་ བུ་མོ། མ་ཡིག་ སྦྱོང་བོ་ གནང་དང་། ཞེས་གསུང་བོ་ འདེམ་བྱ༹ས་ ད་ ཕྱོགས་ གཞན་ལོ་ བལྟ་ན་ མི་རིགས་ གཞན་ཙུ་ལས་ རྒྱབ་ལས་ ལུས་པོ་ འདེམ་ཅིག་ མཐོང་པོ་ ཨིན། འདི་ཙུ་ གན་ བྱ༹ས་སེ་ནེ་ དང་པོ་ མི་རིགས་ གྱངས་ཁ་ན་ ཉུང་བཞིན་ འགྱུ་དོ་ ཨིན།  འབྲས་ལྗོངས་ཀྱི་ ལྷོ་པོའི་ མི་རིགས་ཙུ་ དེང་སང་གི་ དུས་ཚོད་ མཐུན་སྡི་ འགྱུར་བ་ཙུ་ ཉིན་ལས་ ཉིན་ འཐོན་བཞིན་ འོངས་དོ་ སྦད།  གཞོན་པོ་ཙུ་ རང་གི་ སྐད་རིགས་ལོ་ དོ་སྣང་ དང་  སློབ་སྦྱང་ བྱ༹ས་མཁན་ གཞི་རིམ་ སློབ་གྲྭ་སོགས་ དང་ མཐོ་རིམ་ སློབ་གྲྭ་ཙུ་ན་ སློབ་གཉེར་བོ་ཙུ་ ལོ་ ལས་ ལོ་ ཉུང་བཞིན་ འགྱུ་དོ་ ཨིན། གམ་བྱ༹ས་ སེ་ནེ་ དེང་སང་གི་ ཤེས་ཡོན་ དང་ དཔལ་འབྱོར་ ཁེས་སང་གི་ བྱ༹ས་སྟི་ གཞན་གྱི་ སྐད་ དང་ ཡི་གེ་ རིག་གཞུང་ཙུ་ ཤེས་དགོས་པོ་ འདི་ གན་མན་ཚད་ཀྱི་ བློ་གྲོས་ ལྡན་པའི་ གཡོག་ སྦོམ་པོ་ ཅིག་ སྦད། ཨིན་ན་ཡང་ རང་གི་ སྐད་ དང་ ཡི་གེ་ རིག་གཞུང་ཙུ་ ཐམས་ཅད་ རྩ་ཁ་ལས་ སྤངས་སྟི་ གཞན་གྱི་ སྐད་ དང་ ཡི་གེ་ རིག་གཞུང་ཙུའི་ ནང་ལོ་ གཏིང་ རིང་ཀུ་ བྱ༹ས་སྟི་ ནུབ་ འགྱུ་ཤད་ འདི་ མཐའ་ཕུག་ན་ རང་གི་ སྐད་རིགས་ འདི་ རྩ་མེད་ བཟོ་བའི་ མིག་ལྟོས་ ངན་པོ་ ཅིག་ ཨིན་བོ་ མི་ཚད་ རང་གི་ སྐད་རིགས་ལོ་ ཤ་ཚ་ དང་ གཅེས་ཞེན་ མེད་པའི་ རྟགས་ཚན་ཙུ་ཡང་ ཨིན། ང་ཅག་ མ་འོངས་པོ་ལོ་ དོན་མེད་ སྦད་ མནོ་སྟི་ རང་སྐད་ སླབ་ཤད་ སྤངས་ཏོ་ སྦད། ཨོ་ན་ལས་ དོན་ཚན་ འདི་ཙུ་ བྱ༹ས་སྟི་ ང་ཅའི་ ལྷོ་པོའི་ བོ་ཙོ་ཙུ་ སྒེར་གྱི་ སློབ་གྲྭ་ (Private School) ནང་ལོ་ སྐད་རིགས་ སླབ་སྦྱང་ བྱ༹ས་ཤད་ཀྱིས་ གོ་སྐབས་ མེད་ཤད་ བྱ༹ས་སྟི་  ལོ་ ལས་ ལོ་ སློབ་ཕྲུག་ཙུ་ ཉུང་བཞིན་ འགྱུ་དོ་ ཨིན། འདི་ཀི་ སྲུང་ཐབས་ནེ་ རང་རང་ སཽའི་ ཨ་པོ་ ཨ་མོ་ཙུ་ཀིས་ ཐུགས་འགན་ སྦོམ་ཤོས་ ཅིག་ཨིན་ དང་པོ་ རང་གི་ བོ་ཙོ་ཙུ་ སྐད་རིགས་ སྒྲོགས་ཐོབ་པའི་ གོ་སྐབས་ཙུ་ སློབ་གྲྭ་ན་ འདུག་ཀམ་ མེད་འདུག་ཀམ་ལོ་ བརྟག་དཔྱད་ཙུ་ བྱ༹ས་དགོས་པོ་ ལེབ་སྟི་ གལ་ཆེན་ ཡང་ན་ ཐུགས་འགན་ སྦོམ་ཤོག་ཅིག་ ཨིན། དོན་ཚན་ འདི་འདེམ་ལོ་ དོ་སྣང་ གནང་དགོས་པོ་ ལེབ་སྟི་ གལ་ཆེ་དྲགས་ ཨིན། འདེས་རང་ འཐོན་འབག་ འགྱུ་ནེ་ མ་འོངས་པོ་ན་ གན་ མཐོན་ འོངས་གམ? འདི་ལོ་ ང་ཅག་ ཐམས་ཅད་ཀྱིས་ ཐུགས་བསམ་ བཞེས་པོ་ གནང་དགོས་པོ་ གལ་ཆེན་ ཨིན། དོན་ཚན་ འདི་ཙུ་ ཐུགས་ལོ་ བཞེས་སྟི་ ང་ཅག་ ལྷོ་སྐད་ ཡར་རྒྱས་ཀྱི་ དོན་ལོ་ གན་གན་ བྱ༹ས་དགོས་ཤད་ ཞུ་ནེ།   མཁན་ཆེན་ ཚུལ་ཁྲིམས་ བློ་གྲོས་ཀྱིསཿ མི་རིགས་ཙུ་ཀི་ རྣམ་འགྱུར་ འདི་ནེ་ ལེབ་སྟི་ གལ་ཆེན་ ཨིན། པྱ༹་མེད་མ་ མི་རིགས་ཙུ་ཀིས་ རང་གི་ རིག་གནས་ལོ་ སྐྱོན་ལོ་ བལྟ་བ་ གྱུར་པོ་ཅེ་ནེ། གཞན་ གན་མོའི་ཡང་ སྐྱོབས་ མི་ཚུགས་པོ་ དང་ རང་བཞིན་གྱི་ ཉམས་པོར་ འགྱུར་ཤད་ ཨིན། སྐད་རིགས་ འདི་ཀི་ ཁོངས་ལོ་ གཏོགས་པོའི་ མི་ ཐམས་ཅད་ཀྱིས་ ཐུགས་བསམ་ གཅིག་ལོ་  མཐུན་བོའི་ སྒོ་ལས་ རང་གི་ སྐད་ཡིག་ མི་ཉམས་པོ་ དང་ དར་སྤེལ་ བྱ༹ས་ཤད་ཀྱི་ དོན་ལོ་ སེམས་ཤུགས་ དང་ བརྩོན་འགྲུས་ སྦོམ་པོ་ སྐྱེས་དགོས་པོ་ འདི་ གལ་ཆེན་ ཨིན། མི་རིགས་ རང་གི་ སེམས་ཤུགས་ ཆགས་པོ་ དང་ རང་གི་ ཡི་གེ་, རིག་གནས་ལོ་ སྐྱོན་ལོ་ བལྟ་སྟི་ སྣང་མེད་ ཡང་ན་ གཅིག་ཅིག་ལོ་ ཁ་བཏང་ཤད་ བྱ༹ས་བར་ ཅེ་ན་ རང་གི་ སྐད་འདི་ ཉམས་ཤད་ ཨིན་བོ་ དང་ གཞན་ གན་མོའི་ཡང་ སྐད་རིགས་ འདི་ལོ་ སྐྱོབས་ ཐབས་མེད་པོ་ ཨིན། སྐད་རིགས་ ཡར་རྒྱས་ཀྱི་ དོན་ལས་ རང་སྐད་ཀྱི་ དག་ཡིག་, ཚིག་མཛོད་ བསྒྲིག་ཀོ་ དང་ བརྡ་སྤྲོད་ཀྱི་ གཞུང་ རྩ་འགྲེལ་ རྩོམ་བསྒྲིག་ བྱ༹ས་དགོས་པོ་ དང་ གཞི་རིམ་ སློབ་གྲྭ་ རིམ་པོ་ ཁག་གི་ སློབ་ཚན་ཙུ་ཀི་ ཡིག་ཆ་ དེབ་ སྐོར་ སྔོན་མ་ལས་ མེད་མཁན་ འདི་ཙུ་ པར་བསྐྲུན་ བྱ༹ས་དགོས་པོ་ཙུ་ ཕུན་སུམ་ ཚོགས་དྲགས་ བཟོ་བོ་ གནང་དགོས་པོ་ དང་ གཞོན་མེ་ཡང་ ཚོང་ལས་ དང་ ཁྲིམས་ལུགས་ཙུ་ན་ལོ་ རང་གི་ སྐད་ དང་ ཡི་གེ་ ཁྱབ་པོ་ བྱ༹ས་དགོས། འཇུག་ན་ འཕྲིན་ཡིག་གི་ (Letter), ཡིག་ཤུགས་ལོ་ (Envelope), སྤྱི་གཉེར་ཁང་, ལས་ཁུངས་ཀྱི་ (Office) སྒོ་བྱང་, གཞུང་ལམ་གྱི་(High way) ལམ་ཡིག་ ཡོད་ཚད་ རང་གི་ སྐད་ཡིག་གིས་ བྲི་ དགོས། འགྲེམ་བརྡ་ (Notice), མགྲོན་ཡིག་ (Invitation card), ཚོགས་འདུའི་ ཟིན་ཐོ་, རང་གི་ སྣུམ་འཁོར་, ཁྱིམ་གྱི་ སྒོ་བྱང་, འགྱུ་མཐུན་, (Mobile)  གསང་ཐག་ (Internet) དང་ ལོ་ལྟར་ སྐད་རབས་ ཡར་རྒྱས་ ཚོགས་པོའི་ སྐད་རིགས་ཀྱི་ ཡར་རྒྱས་ཀྱི་ སྐོར་ལས་ རྫོང་ཁག་ཙུ་ན་ལོ་ ཚོགས་འདུ་ ཚོགས་བཞིན་ ཡོད་པོ་ སྦད། རང་རང་ སཽའི་ གྱོང་ན་ལོ་ཡང་ ཕ་སྐད་ མི་ ཤེས་མཁན་ གཞོན་བོ་ སློབ་ཕྲུག་ཙུ་ལོ་ རང་སྐད་ སློབ་སྦྱོང་ དོན་ལོ་ འཛིན་གྱལ་ བཙུགས་ཤད་ བྲི་ཤད་ སྒྲོགས་ཤད་ ལབ་ཤད་ཀྱི་ གཡོག་ཙུ་ བྱ༹ས་ཤད་ དང་ ཕ་སྐད་ཀྱི་ གསར་ཤོག་ (News paper), རླུང་འཕྲིན་ (Radio), དུས་དེབ (Bulletin), དེབ་ (Book), འགོ་བརྗོད་ སྣ་ཚོགས་ཙུ་ སྐོར་ བྲི་ཤད་ དང་ སྐད་རིགས་ ཡར་རྒྱས་ཀྱི་ དོན་ལོ་ རང་རང་ སཽའི་ གྱོང་ན་ ཚོགས་པོ་ཙུ་ བཙུགས་ཀོ་ གནང་དགོས་པོ་ གལ་ཆེན་ ཨིན། དེང་སང་གི་ གསར་ཐོན་བོའི་ ཆ་ཀ་ འདི་ཙུ་ལོ་ མིང་ཚིག་ དང་ མཐུན་པོ་ མིང་གསར་པོ་ཙུ་ བཏགས་སྟི་ ཚིག་མཛོད་ཙུ་ན་ལོ་ བཅུག་དགོས་པོ་ གལ་ཆེན་ ཨིན། སྐད་ཡིག་ འདི་ཙུ་ གློག་རྡུལ་ ལག་རྩལ་ ནང་ལོ་ གློག་རྡུལ་ རྩིས་འཕྲུལ དང་ བརྡ་འཕྲིན་གྱི་ མྱུར་འགྱུས་ ལམ་ཐོག་ལོ་ བཞག་ཀོ་ བྱ༹ས་དགོས་པོ་ གལ་ཆེན་ ཨིན། འདི་ འདྲ་བོ་ བྱ༹ས་ དེང་སང་ སྤྱི་ཚོགས་ལོ་ ཕན་བོའི་ (Social Media ) གདོང་དེབ་ (Facebook, WhatsApp, WeChat & Google+)  ནང་ལོ་ སྐད་ དང་ རིག་གཞུང་སྐོར་ལོ་ (Facebook@Denjonke Lho kay Group, DLK Page, DLK Blog & DLK Youtube) ནང་ལོ་ སྐད་རིག་ རིག་གཞུང་ཡར་རྒྱས་ དོན་ལས་ ཚོགས་པོ་ བཟོ་སྟི་ རང་རང་ སཽའི་ སྐད་རིགས་ ཡར་རྒྱས་ བཏང་བའི་ དོན་ལས་ བསམ་ཆར་ཙུའི་ གཅིག་ཅིག་ལོ་ བཀའ་མོལ་ དང་ བསམ་འཆར་ བཀའ་སློབ་ཙུ་ བཀོད་དགོས་པོ་ དང་ རིག་གཞུང་སོགས་ མ་ཤེས་མཁན་ལོ་ ཤེས་ཡོན་ འཇོས་ བདེ་དྲགས་ བྱ༹ས་སྟི་ རང་གི་ སྐད་རིགས་ སྐོར་ལས་ དྲི་བ་ དྲི་ལན་ཙུ་ གནང་དགོས་པོ་ གལ་ཆེན་ ཨིན། སྤྱི་ཚོགས་ལོ་ ཕན་བོའི་ ཚོགས་པོ་ཙུ་ན་ ཐུགས་འགན་ བཞེས་དགོས་པོ་ ལེབ་སྟི་ གལ་ཆེན་ ཅིག་ སྦད། ད་ལྟ་ དུས་ཚོད་ ནང་ལོ་ ང་ཅག་གི་ འདི་འདྲ་བོ་ གོ་སྐབས་ བཟང་པོ་ ཐོབ་ཡོད་པོ་ དང་ ད་ལྟ་  ང་ཅག་གི་ བདེ་སྤྱོད་ བྱ༹ས་ཚུགས་པོ་ ཡོད་པོ་ ཨིན། ཚོགས་པོ་ འདི་ཙུ་ན་ལོ་ རང་གི་ སྐད་རིགས་ ཡར་རྒྱས་ཀྱི་ དོན་ལས་ བྲི་རྩོམ་, ལོ་རྒྱུས་, ཁ་གཏམ་ཙུ་ བྲི་སྟི་ འཛམ་གླིང་ ས་ཕྱོགས་ ཐམས་ཅད་ན་ རང་གི་ སྐད་ཡིག་ཙུ་ ཁྱབ་འཕེལ་ བྱ༹ས་ཤད་ཀྱི་ གོ་སྐབས་ བཟང་པོ་ཙུ་ ད་ལྟ་ ང་ཅག་ལོ་ ཐོབ་དུས་ལོ་ བདེ་སྤྱོད་བྱ༹ས་ དགོས་པོ་ ལེབ་སྟི་ གལ་ཆེན་ ཨིན། གཞན་ ཕ་སྐད་ལོ་ དབང་ བྱ༹ས་མཁན་ཙུའི་ སྐད་ཡིག་  འདི་ཙུ་  འདྲ་བོ་ བྱ༹ས་ མཉམ་པུ་ལོ་ འགྱུ་ཚུགས་པོ་ འདྲ་བོ་ ཅིག་ལོ་ བརྩོན་འགྲུས་ གནང་དགོས་པོ་ གལ་ཆེན་ ཨིན།  མཐའ་ན་ ཁྱིམ་ ནང་ལོ་ དང་ སྣུམ་འཁོར་ཙུ་ ནང་ལོ་ འགྱུ་བའི་ སྐབས་ལོ་ རང་གི་ རིག་གཞུང་ དང་ མཐུན་པའི་ གསུང་གླུ་ཙུ་ ཉན་དགོས་པོ གལ་ཆེན་ ཨིན། འདེས་ མ་ཡ་ནེ་ ང་ཅའི་ ལྷོ་སྐད་ འདི་ མ་འོངས་ པོ་ན་ སྐད་རིགས་ མེད་པོ་ མཐོན་འོངས་བོའི་ ཉེན་ཁ་ སྦོམ་པོ་ ཅིག་ སྦད།

དོན་ཚན་ འདི་ཙུ་ ང་ཅག་ ཐམས་ཅད་ཀྱིས་ ཐུགས་ཕན་ གསོ་དགོས་པོ་ གལ་ཆེན་ ཨིན། ད་ འབྲས་ལྗོངས་ཀྱི་ ལྷོ་པོ་ ང་ཅག་ ཐམས་ཅད་ཀྱི་ རིག་གཞུང་ དང་ སྐད་རིགས་ལོ་ ཐུགས་བསམ་ བཞེས་གནང་དགོས་པོ་ དང་ ཐུགས་འགན་ སྦོམ་ཤོག་ ཅིག་ ཨིན། ད་ལྟ་ ལས་རང་ ང་ཅག་ ཐམས་ཅད་ཀྱི་ མཉམ་རུབ་ མཉམ་མཐུན་ གནང་སྡི་ ཡར་རྒྱས་ཀྱི་ སྐོར་ལོ་ བརྩོན་འགྲུས་ རྒྱ་ཆེ་དྲགས་ གནང་བོ་ གནང་གེས། ད་ འབྲས་ལྗོངས་ཀྱི་ མཁས་དབང་ ལྷན་རྒྱས་ཙུ་ དང་ མ་འོངས་པོ་ ནང་ལོ་ འོངས་མཁན་ གཞོན་པོ་ཙུ་ ཐམས་ཅད་ཀྱིས་ ཐུགས་འགན་ སྦོམ་ཤོས་ གཅིག་ འདི་ སྐད་རིགས་ ཡར་རྒྱས་ལོ་ ཐུགས་བསམ་ བཞེས་པོ་ གནང་དགོས་པོ་ འདི་ གལ་ཆེན་ ཨིན་ནོ༎ ༎
འབྲས་ལྗོངས་པོ་ ཐུབ་བསྟན་དཔལ་བཟང་།