སྦས་གནས་ འབྲས་མོ་ལྗོངས།

སྦས་གནས་ འབྲས་མོ་ ལྗོངས་འདི་ ན། གུ་རུ་ བྱིན་གྱིས་ བརླབས་པའི་ གནས།

ཚོགས་བསགས་ བསོད་ནམས་ བཟང་པོའི་ སྐྱེས། ཉམས་ཆུང་ བྱང་ཆུབ་ སེམས་ལྡན་པོས།།

གུ་རུ་ རྣལ་འབྱོར་ ཐུགས་རྗེ་ ལས། དམ་ཆོས་ བསྟན་པོ་ དར་པོ་ ཨིན།

གནས་རི་ བྱ༹ག་ལོ་ དགོན་པོ་ ཡོད། བསྟན་པོ་ མི་ཉམས་ སྲུང་བའི་རྟགས།།

གུ་རུ་ གྱེད་འབུམ་ ལུང་བསྟན་ བཞིན། གངས་རི་ གནས་ཀྱི་ ཡུལ་ལྗོངས་ན།

ཐེག་ཉོ་ ཀོང་གི་ ཐུགས་རྗེ་ལས། ལྷོ་རིགས་ རྒྱུད་པའི་ རིགས་རྒྱུས་དར།།

ལྷོ་རིགས་ རྒྱལ་པོ་ ཕུན་ཚོགས་ཀྱིས། ཁོང་གི་ རྒྱུད་པོ་ རྒྱལ་བཅུ་གསུམ།

རྒྱལ་པོ་ དང་པོ་ གཡུག་སམ་ལོ་། དུས་བཟང་ ཉིན་ལོ་ གསེར་ཁྲི་གསོལ།།

ལྷོ་སྐད་ ཡོད་པོ་ རིགས་གཞུང་འདི། ཡི་གེ་ བྲིས་སྲོལ་ མེད་པོ་ འདི།

ནོར་ལྡན་ པདྨ་བཀྲིས་ བྷ་ཆུང་གིས། བྲིས་སྲོལ་ ཡོད་པོ་ ཁོང་གི་དྲིན།།

གོང་འཕེལ་ གཞོན་བོ་ཙུ་ཀི་ འགན། ཉིན་རེ་ ཚིག་རེ་ སྦྱང་བོ་གནང་།

སློབ་གྲྭ་ མཐོ་རིམ་ ནང་ལོ་སྦྱོང་། ཐིག་རེ་ བསགས་ན་ རྒྱ་མཚོ་གང་།།

ཐམས་ཅད་ ཁོང་གི་ བཀའ་དྲིན་བསམ། ནོར་བུ་ ལག་ཀ་ ཡོད་པོ་དུས།

རིན་ཆེན་ དོན་འདི་ མ་ཤེས་ན། རྒྱབ་ལས་ འགྱོད་པོ་ སྐྱེད་འོང་ཉ།།

 ལྷོ་རིགས་ ལྷན་རྒྱས་ ཐམས་ཅད་ཀྱིས། ཐུགས་བསམ་ བཞེས་པོ་ གནང་དགོས་ཉ།

 ཐོ་རང་ ལབ་སྟི་ མ་བཞུགས་ཀེ། ཡར་རྒྱས་ དོན་ལས་ གན་གནང་ཤད།།

Denjongpo Thupten Palzang

འབྲས་ལྗོངས་པོའི་ ཁ་གཏམཿ

རྐུམ་ རྐྱབས་མཁན་ མིའི་ ཁ་སྦོམ་པོ། འང་ རྐྱབས་མཁན་ མིའི་ སྣ་ སྦོམ་པོ།

རང་ཁྱིམ་ན་ ཨ་ཇོ་ སྟག  མིའི་ ཁྱིམ་ན་ ཨ་ལུས་ ཝམ།

ཨ་པོ་ གཅིག་གི་ བུ་ མིན་འདྲ། ལག་ཀོ་ གཅིག་གི་ མཛུབ་མོ་ མིན་འདྲ།

ནགས་ཙན་ན་ ཝམ་ངུ་། བྱ༹འི་ ཁྱི་ན་ བྱ༹་ འབྱ༹ང་།

སྦལ་པས་ སྟག་ དཀྲོག་ཀོ། བུམ་ བཏིབ་སྟི་ མནའམ་ དཀྲོག་ཀོ།

སྦྱ༹ང་ཀ་ལོ་ བྱིན་ཉེ་ མ་ལབ། མོ་རེངས་མ་ལོ་ འཁྱིགས་ཉེ་ མ་ལབ།

སྤྱི༹འུ་ བྱང་ཁར་ ཁབ་ མི་ཆགས། སྒང་ སྟེང་ཁར་ ཆུ་ མི་ཆགས།

རི་བོང་ གནམ་ རམ་བའི་ སེམས་ནད། ད་རི་འབུ་ ས་ རྫོགས་པའི་ སེམས་ནད།

ལབ་ཤེས་ མིའི་ གཡོག་ཀུ། ཁ་ཤེས་ མིའི་ དཔོན་པོ།

བཟང་པོའི་ གྱོས་ ཕྱི་རུ། ངན་པོའི་ གྱོས་ སྔ་རུ།

ཝམ་ བསྡ་པར་ འགྱུ་བའི་ སྒང་། སྟག་ བསད་པའི་ ལག་ཅ།

མི་གཅིག་ ལེགས་ན་ ཆུང་ལས། རྟ་གཅིག་ ལེགས་ན་ རྟིའུ་ལས།

ཟང་ཟིང་ན་ གཟུགས་ཟོན། ལྟོགས་མུག་ན་ ས་ཉོན་གྱི་ ཟོན།

བླ་མས་ ག་སྟོན་ ཆོས། མཛུབ་མོས་ ག་སྟོན་ ཤ།

ཆོས་སྐྱོངས་ རང་འགོ་ མ་ མཐོན་མཁན། མགོ་ནག་ མིའི་ བར་ཆད་ བསིལ་མཁན།

སྣོད་ སྟོང་པོའི་ སྐད་སྒྲ་ སྦོམ། མི་ ངན་པོའི་ ལྟ་བོ་ སྦོམ།

དགོན་པོའི་ ཁྱི་ལོ་ རྡོ་ རྐྱབས་ན། བླ་མའི་ ཐུགས་ལོ་ ཕོག།

འཆེས་པོས་ ཟུར་མིག་ ལྟ། གུ་སྡིག་ཀས་ སོ་རྐང་ འཇིབ།

བཟོ་ མཁས་པས་ རྐྱབས། སྐྱོན་ ལྐུག་ཀས་ བཏོན།

བུ་ ཞེ་ལོག་ ཏོག་ཡུ་ ལུག་ལུག་ཀར། བུམ་ ཞེ་ལོག་མོ་ ཨོ་ཉེ་ ཨོམ་ བྱི༹ན་བྱི༹ན་བར།

ལབ་ ཤེས་ན་ ཁའི་ ཟོན། འགྱུ་ ཤེས་ན་ རྐང་པོའི་ ཟོན།

སྔ་རུ་ ལྷ་སྒོ་ ཕྱི༹། ཕྱི༹་རུ་ འདྲེ་སྒོ་ བཅད།

ཕམ་ ཞན་བོའི་ བོ་ཙོ། ཞིང་ ཞན་བོའི་ ལོ་ཐོག།

བསམ་བློ་ སྔོནལོ། འགྱོད་བོ་ བཤུལ་ལོ།

ཁྱི་ སྤྱོད་ངན་ མནོ་བསམ་ བཏང་ བཞིན་ངུ་། མི་ སྤྱོད་ངན་ རང་སྐྱོན་ སྦས་བཞིན་ ངུ་།

མེས་ ལྗེན་པོ་ མི་ལབ། རྒྱལ་པོས་ སྤྱ༹ང་ཀ་ མི་ལབ།

ཟ་ཁར་མ་ བཙོག་ཀོ་ མ་བསམ། ཉལ་བའི་ སྒང་ བུ་ལེན་ མ་བསམ།

ཟམ་ ཉུང་ཉུང་ བཅུད། ཟམ་ མང་དྲགས་ ལུད།

ཨ་ལུས་ མེད་པའི་ རྒྱལ་ལོ། བི་རྩི་ཀི་ གཞས།

ཆང་ སྐྱུར་མའི་ ཁག་མང་། མི་ ངན་པའི་ གྱོས་ མང་།

ཞེ་ལོག་ ཞིམ་དད་ ཆེ། མེད་པོ་ཅན་ ཛ་ དད་ ཆེ།

ལེམ་ ལབ་ན་ མི་ མི་དགའ། འབྱི༹ག་ཀོ་ དབྱུག་ན་ ཁྱི་ མི་དགའ།

ཟ་མྱོང་ མེད་པའི་ མི་ལོ་ སྣེའོ་ཚིག་ བྱོ༹ག་ཀོ་ ཚོར།

འགྱུ་མྱོང་ མེད་པའི་ མི་ལོ་ ཐེམ་པང་ ལ་ ཚོར།

ཟུག་ མགོའི་ སྟེང་། སྨན་ ལྟི་སྟི་ སྟེང་།

                                              
ཐུབ་བསྟན་དཔལ་བཟང་། རྒྱལ་ཞིང་ མཐོ་རིམ་ སློབ་གྲྭ།
 ལྷོ་སྐད་ ལེ་ལག།