Powered By Blogger

Thursday 30 August 2012


                 སློབ་ཚན་ འཆར་གཞིའི་ གཞི་རྩ་ཙུཿ

    དམིགས་བསལ་གྱི་ སློབ་ཚན་ བསླབ་སྟོན་གྱི་ ཐོག་ལོ་ ཡོད་དགོས་པོ།
  
         ༼ཀ༽སློབ་ ཚན་ འཆར་གཞི་ ལབ་པའི་ དོན་ནེ།

༡ སློབ་ཚན་ འཆར་གཞི་ ལབ་ནེ་ སློབ་ཚན་ སླབ་བཤད་ཀྱི་ འཆར་གཞི་ གལ་ཆེན་ཅིག་ ཨིན། འདི་ དཔེར་ན་ ཡུལ་གཅིག་ལོ་ འགྱུ་བའི་ སྐབས་ལོ་ ཡོད་དགོས་པོ་ ས་ཁྲ་ ཡང་ན་ ལམ་ དང་ འདྲ་བོ་ ཨིན། གམ་བྱ༹ས་ སེ་ན་ ས་ཁྲ་ ཡོད་ན་ ང་ཅག་ ཡུལ་མཆོག་ ག་ན་ལས་ འགྱུ་ཤད་ དང་ གན་བྱ༹ས་ཤད་ཀྱི་ འཆར་གཞི་ གོ་ཚུགས་ཤད་ ཨིན།
༢ སློབ་ཚན་ འཆར་གཞི་ འདི་སློབ་ཕྲུག་ཙུ་ལོ་ ང་ཅག་གི་ ག་ཏེ་ སླབ་ཤད་ཀྱི་ སྐོར་ལས་ དུས་ཚོད་ དང་ མཐུན་འདི་ ང་ཅག་གི་ འཆར་གཞི་ཙུ་ བཟོ་ དགོས།
༣ སློབ་ཚན་ འཆར་གཞི་ འདི་སློབ་དཔོན་གྱིས་ རིའུ་མིག་ཙུ་ན་ ལེའུ་ཚན་ གོ་བརྗོད་ཙུ་ སྐོར་ལས་ བྲིས་དགོས་པོ་ སྦད།
༤ སློབ་ཚན་  འཆར་གཞི་ འདི་ བདེ་དྲགས་བཟོ་ དགོས་པོ་ གལ་ཆེན་ ཨིན། གན་ བྱ༹ས་ སེ་ན་ སློབ་ཕྲུག་ཙུ་ འཇམ་དྲགས་ བྱ༹ས་སྟི་ ཧ་ གོ་ཚུགས་པོ་ ཡོད་དགོས།
༥ སློབ་ཚན་ འཆར་གཞི་ འདི་ནང་ལོ་ ལེའུ་ཚན་ རྒྱས་དྲགས་ བྱ༹ས་སྟི་ སློབ་ཕྲུག་ཙུ་ལོ་ སྦྱང་དར་ བྱ༹ས་བཅུག་ཤད་ གལཆེན་ ཨིན།
༦ སློབ་ཚན་ འཆར་གཞི་ འདི་ སློབ་ཕྲུག་ཙུའི་ དོན་ལོ་ ལེབ་སྟི་ གལ་ཆེན་ གཅིག་ ཨིན། སློབ་ཚན་གྱི་ གཞི་ལོ་ བཞག་སྟི་ སློབ་ཕྲུག་ཙུ་ལོ་ གོ་བ་ཙུ་ འཇམ་དྲགས་ བྱ༹ས་སྟི་ ཧ་ གོ་ཤད་ དང་ ཁོང་གི་ དམིགས་ཡུལ་ གཙོ་བོ་  ཐོབ་པའི་ དོན་ལས་ ཐུགས་བསམ་ བཞེས་པོ་ གནང་དགོས་པོ་ གལ་ཆེན་ སྦད། འཛིན་གྱལ་ ཆོས་རྒྱུགས་ དང་ ཁྱིམ་གྱི་ ནང་སྦྱང་ གཡོག་འགན་ཙུ་ལོ་ ཡང་ ཐུགས་བསམ་ བཞེས་པོ་ གནང་དགོས་པོ་ གལ་ཆེན་ ཨིན།
   
༼ཁ༽གན་བྱ༹ས་ སློབ་ཚན་ འཆར་གཞི་ གལ་ཆེན་ འབོ།

༡ གཡོག་གན་ བྱ༹ས་རུང་ འཆར་གཞི་ ཡོད་པོ་ འདི་ གལ་ཆེན་ གཅིག་ཨིན། དཔེར་ན་ ཁྱིམ་ཅིག་ བཟོ་བ་ལོ་ སྔོན་ལས་ འཆར་གཞི་ ལེམ་ཅིག་ ཡོད་དགོས། ཨོ་འདི་ དང་ འདྲ་བོ་ སློབ་དཔོན་ དང་ སློབ་དཔོནམ་ཙུ་ འཛིན་གྱལ་ སྦྱང་དར་གྱི་ དོན་ལས་ སློབ་ཚན་གྱི་ འཆར་གཞི་ འདི་ ལེབ་སྟི་ གལ་ཆེན་ཅིག་ ཨིན།
༢ སློབ་ཚན་ འཆར་གཞི་ བཟོ་དགོས་པོ་ འདི་ ཉིན་གཅིག་ལོ་ གན་གན་ སྦྱོང་དར་ བྱི༹ན་ཤད་ སྐོར་ལས་ ཡོད་དགོས་པོ་ གལ་ཆེན་ ཨིན།
༣ འཆར་གཞི་ འདི་ སློབ་དཔོན་ དང་ སློབ་དཔོནམ་ཙུ་ལོ་ གནད་གག་ ལེམ་ ཐོབ་ཙུད་ཤད་ ཨིན།
༤ འཆར་གཞི་ འདི་ སློབ་ཚན་ རིམ་པོ་ བྱ༹ས་སྟི་ སླབ་ཚུགས་པོ་ དང་ གོ་བ་ཙུ་ བྱིན་ཚུགས་ ཤད་ ཨིན།
༥ སློབ་དཔོན་གྱིས་ ཕྲུག་ཙུའི་ སྐོར་ལས་ དཀལ་ངལ་ཙུ་ གསེལ་ཚུགས་་པོ་ མི་ཚད་ ཤེས་ཡོན་ལོ་ ཡར་རྒྱས་ ཐོན་ཚུགས་པོའི་ དོན་ལས་ ཨིན།
༦ སློབ་ཚན་ འཆར་གཞི་ སློབ་ཕྲུག་གི་ ཤེས་ཚད་ དང་ མཉམ་པོ་ བྱ༹ས་སྟི་ བཟོ་དགོས་པོ་ གལ་ཆེན་ སྦད།
༧ སློབ་ཚན་ འཆར་གཞི་ འདི་ སློབ་དཔོན་ དང་ སློབ་དཔོནམ་ཙུ་ཀི་ སེམས་ཤུགས་ཙུ་ ཐོབ་ཙུ་པའི་ དོན་ལས་ ཨིན།
༨ འཆར་གཞི་ བཟོ་དགོས་པོ་ འདི་ མཉམ་མྱོང་ ཐོབ་པའི་ དོན་ལས་ དང་ སྦྱང་དར་ ལཱེམ་བྱ༹ས་སྟི་ ཐོབ་ཚུགས་པོའི་ དོན་ལས་ གལ་ཆེན་ སྦད།
༩ འཆར་གཞི་ འདི་ ཡོད་ན་ རང་བཞིན་ ཤེས་ཡོན་ཙུ་ ཡར་རྒྱས་ ཐོབ་ཚུགས་ཤད་ ཨིན།

༼ག༽ནམ་རྒྱུན་ སློབ་ཕྲུག་གི་ དོན་ལས་ འཆར་གཞི་ཙུ་ ཡོད་དགོས་པོ།

༡ སློབ་ཚན་ མན་འདྲ་བོ་ དོན་ལོ་ སློབ་ཕྲུག་ཙུ་ ཤེས་ཡོན་ལོ་ སེམས་ཤུགས་ དང་ སྦྱང་འདོད་ བྱ༹ས་བའི་ དོན་ལས་ འཆར་གཞི་ བཟོ་དགོས་པོ་ གལ་ཆེན་ ཡོད་ཀོ།
༢ སློབ་ཕྲུག་གི་ ཤེས་ཡོན་ལོ་ མཉམ་ཞིབ་ ཡང་ན་ ཞིབ་དཔྱད་ བྱ༹ས་དགོས་པོ་ གལ་ཆེན་ ཨིན།
༣ སློབ་དཔོན་ དང་ སློབ་དཔོནམ་ཙུ་ དེང་དུས་ཀྱི་ རིག་གསར་ཀྱི་ ཐོག་ལས་ ཤེས་ཡོན་ བྱིན་དགོས་པོ་ གལ་ཆེན་ ཨིན།
༤ སློབ་དཔོན་ཙུ་ཀིས་ སློབ་ཕྲུག་ཙུ་ལོ་ སེམས་ཁམས་ རིག་ཀོ་ རྟག་དཔྱད་ བྱ༹ས་དགོས་པོ་ གལ་ཆེན་ ཨིན།
༥ སློབ་དཔོན་ཙུ་ཀིས་ སློབ་ཕྲུག་ཙུ་ལོ་ ཤེས་རིག་ དང་ སྦྱང་དར་ སྐོར་ ཧ་ གོ་དགོས་པོ་ གལ་ཆེན་ ཨིན།

༼ང༽འཛིན་གྱལ་ ནང་ལོ་ མཁོ་ཡོད་པོའི་ གཡོག་ དང་ སློབ་དཔོན་གྱི་ ཐུགས་འགན་ནེ།
སློབ་ཚན་ འཆར་གཞི་ ཡོད་དགོས་པོ།
འཛིན་གྱལ་ ནང་ལོ་ འོང་བའི་ སྐབས་ལོ་ ཞལ་འཛུམ་ དང་ ལྡན་པོ་ ཡོད་དགོས།
འཛིན་གྱལ་ ནང་ལོ་ འོང་ལོང་ མེད་པས་ སློབ་ཚན་ འགོ་མ་བཙུགས་ཀོ་ སྔོན་མའི་ སློབ་ཚན་ སྐོར་ལས་ དྲི་བ་ དྲི་ལན་ བྱ༹ས་དགོས་པོ་ སྦད།
སློབ་ཚན་གྱི་ སྐོར་ལས་ སྙིང་དོན་ མདོར་བསྡུས་ བཤད་ཤད།
སློབ་ཚན་ འགོ་བརྗོད་ཀྱི་ གསལ་བཤད་ བྱ༹ས་ཤད་ དང་ ནག་པང་ན་ལོ་ བྲི་ཤད།
ལེའུ་ཚན་ ནམ་ཡང་ ཉིན་གཅིག་ལོ་ མྱོ༹ང་ཤད་ བྱ༹ས་མི་མཆོག།
ལེའུ་ཚན་ ཆ་གཉིས་ དབྱེར་ཕྱི༹་ དགོས་པོ་ སློབ་ཕྲུག་གི་ ཤེས་ཚད་ ཐུན་འདི་ སློབ་སྦྱོང་ཙུ་ བྱིན་དགོས་པོ་ གལ་ཆེན་ ཨིན།
ཤེས་ཡོན་ སློབ་ཕྲུག་ཙུ་ལོ་ འཇོ་བདེ་དྲགས་ བྱ༹ས་སྟི་ ལབ་པོ་ གནང་དགོས།
ཤེས་ཡོན་ཙུ་ སློབ་ཕྲུག་ལོ་ དཔེ་དང་ བཅས་པོ་ སླབ་པོ་ དགོས་པོ་ གལ་ཆེན་ ཨིན།
༡༠ སྐབས་ སྐབས་ན་ སློབ་ཕྲུག་ཙུ་ལོ་ དྲི་བ་  དྲི་ལན་ བྱ༹ས་དགོས།
༡༡ སློབ་ཕྲུག་ རང་རང་སཽའི་ མིང་ཙུ་ འབོད་སྟི་ དྲི་བ་ དྲི་དགོས།
༡༢ ཕྱོགས་བཞི་ལོ་ ཡོད་པའི་ སློབ་ཕྲུག་ཙུ་ལོ་ དྲི་བ་ཙུ་ དྲི་དགོས།
༡༣ སློབ་དཔོན་གྱི་ སློབ་ཕྲུག་ཙུ་ལོ་ ལན་ཙུ་ ལཱེམ་བྱ༹ས་སྟི་  རྐྱབས་དགོས།
༡༤ སློབ་ཚན་ ལྡན་པོ་ ཆ་ག་ཙུ་ ལག་ལེན་ གོ་ཚུགས་པོ་ བྱ༹ས་དགོས།
༡༥ ཚིག་ གལ་ཆེན་ཙུ་ ལོག་ཅན་  བརྗོད་བདེ་ བྱ༹ས་དགོས།
༡༦ ནག་པང་ན་ ཡི་གེ་ བྲི་བའི་ སྐབས་ལོ་ ཕྱོགས་ཅིག་ལས་ འགོ་བཙུགས་ཀོ།
༡༧ ནག་པང་ལོ་ ཡི་གེ་ བྲི་བའི་ སྐབས་ལོ་ སྦོམ་ཆུང་ ལྡན་པོ་ བྲི་དགོས་པོ་ དང་ གཙང་དག་ ཡོད་དགོས།
༡༨ ཚིག་ གསར་པོ་ གལ་ཆེན་ཙུ་ ནག་པང་ན་ བྲི་སྟི་ སླབ་དགོས།
༡༩ ལེའུ་ཚན་ སླབ་མྱོ༹ང་ཀོ་ལས་ དྲི་བ་ཙུ་ དྲི་དགོས།
༢༠ སློབ་ཚན་གྱི་ སྙིང་དོན་ཙུ་ གོ་འཇོ་ བདེ་དྲགས་ བྱ༹ས་སྟི་ སླབ་ བྱི༹ན་ དགོས།
༢༡ འཇུག་ན་ སློབ་ཕྲུག་ཙུ་ལོ་ ཁྱིམ་གྱི་ ནང་སྦྱང་ཙུ་ བྱི༹ན་དགོས་ འདི་ ཡང་ སློབ་ཕྲུག་ ཤེས་ཚད་ དང་ ལྡན་པོ་ བྱ༹ས་སྟི་ བྱི༹ན་དགོས།
༢༢ འཇུག་ན་ སློབ་དཔོན་ཙུ་ ནག་པང་ན་ བྲི་ཡོད་ ཡིག་གཟུགས་ཙུ་ སུབ་དགོས།
     ༢༣ སློབ་དཔོན་གྱི་ འཛིན་གྱལ་ ཁང་མིག་ ལཱེམ་ གཙང་དྲགས་ ཡོད་མེད་ བལྟ་ དགོས་པོ་ གལ་ཆེན་ ཨིན།        

༼ཅ༽སྤྱིར་སྟང་གི་ སློབ་ཕྲུག་ཙུ་ལོ་ སློབ་ཚན་ འཆར་གཞི་ སླབ་པའི་ སྐབས་ལོ་ ཡོད་དགོས་པོ།
(General Objective)
༡༽ཤེས་ཡོན་ སྦྱང་བའི་ དོན་ལས་ སྒྱུ་རྩལ་ བཞི་ ཤེས་ དགོས། ཉན་ཤད་ ལབ་ཤད་ སྒྲོགས་ཤད་ དང་ བྲི་ཤད་ བཞི་ ཡོད་དགོས།
 (Specific Objective)
༢༽སློབ་ཚན་ དང་ ལྡན་པོ་ དམིགས་ཡུལ་ གཙོ་བོ།
སློབ་ཚན་ སྙིང་དོན་ མདོར་བསྡུས་ དང་ དོན་དག་ཙུ།
སློབ་ཚན་ སྒྲ་དག་ གསལ་བརྗོད་ཙུ་ ཡོད་དགོས།
སློབ་ཚན་ ཐུན་པའི་ སྐད་རིག་ཀོ་ཙུ་ སླབ་ བྱི༹ན་དགོས།
སློབ་ཕྲུག་ལོ་ ཚིག་ཙུ་ དག་སྒྲགས་ བྱ༹ས་སྒྲོགས་ བཅུད་ཀོ།
དེབ་གྱི་ སྐོར་ལས་ གསལ་བཤད་ བྱ༹ས་དགོས།

༣༽སློབ་འཁྲིད་ ཡོ་བྱད་་་་་་་་་་་ཕྱི་རས་, ནག་པང་, ས་སྨྱུག་, སློབ་ཚན་དེབ་, བརྡ་གསལ་བྱེད་ དང་ སློབ་ཚན་ཐུན་ རིས་མོ་ཙུ་ ཡོད་དགོས། (Teaching Aid)
༤༽དམིགས་གསལ་གྱི་ ཤེས་ཡོན་ སྦྱང་དར་ དོན་ལས་ དམིགས་ཡུལ་ སློབ་ཕྲུག་ཙུ་ལོ་ འཛིན་གྱལ་ ནང་ལོ་ སློབ་ཚན་ ཐུན་བའི་གོ་ལས་ གླུ་ཙུ་ ཐོག་ལས་ ཤེས་ཡོན་ཙུ་ སླབ་དགོས་ དང་ སྦྱང་བ་ བྱ༹ས་ཤད་ཀྱི་ དོན་ལས་ སེམས་ཤུགས་ སྐྱེས་བཅུད་ཀོ་ གལ་ཆེན་ ཨིན།(Motivation)
འདི་ གན་ འབོ? དེབ་ཙུ་ སྟོན་འདིས།
དེབ་འདི་ སྒྲོགས་ཀོ?
དེབ་ འདི་ལས་ ཤེས་ཡོན་ གན་ཐོབ་ ཤད་འབོ?
དེབ་ འདི་ ག་ན་ལས་ ཐོབ་ཤད?
དེབ་ འདི་ ག་ན་ལས་ པར་སྐྱབས་པོ་ འདི་འདེམ་ དྲི་བ་ཙུ་ དྲི་ དགོས།
༥༽སློབ་ཚན་གྱི་ འགོ་བརྗོད་ གསལ་བཤད་ བྱ༹ས་ཤད།
༦༽ངོ་སྤྲོད་ (Presentation)
   སྔོན་བརྗོད་, སློབ་དཔོན་གྱིས་ མཛད་བྱ་སློབ་ཕྲུག་གིས་ གཡོག་ དང་ ནག་པང་གི་ གཡོག།
༧༽སློབ་ཚན་ ལོག་ཅན་ མདོར་བསྡུས་ བྱ༹ས་ བཤད་ཤད་ བྱ༹ས་དགོས། (Recapitulation)
༨༽ནང་སྦྱང་ གཡོག་འགན། (Home Assignment)